«Aýyl sharýashylyǵyn qarjylaı qoldaý qory» AQ-nyń nesıe qorjyny 49 mlrd. teńgeni qurady
ASTANA. QazAqparat - Búgingi tańda «Aýyl sharýashylyǵyn qarjylaı qoldaý qory» AQ-nyń nesıe qorjyny 49 mlrd. teńgeni qurap, 22 200 belsendi qaryz alýshyny qamtyp otyr. Bul týraly búgin Ortalyq kommýnıkatsııalar qyzmetinde ótken brıfıngte qordyń basqarma tóraǵasy Narmuhan Sarybaev málim etti.
Onyń aıtýynsha, «Aýyl sharýashylyǵyn qarjylaı qoldaý qory» AQ aýyldy jerlerdegi kásipkerlikti damytý boıynsha memlekettik ınstıtýt bolyp tabylady jáne óz qyzmetin QR Prezıdenti Nursultan Nazarbaevtyń oılaryn júzege asyrýǵa baǵyttaıdy. «17 qańtardaǵy Qazaqstan halqyna Joldaýynda Elbasymyz agroónerkásip keshenin ınnovatsııalyq jolǵa baǵyttaýdyń mańyzdylyǵyn atap ótti. Jáne «bolashaq - agrarlyq salada, negizinen, shaǵyn jáne orta bıznes formasyndaǵym jańa óńdeý kásiporyndaryn qurýda» dep aıqyn kórsetken bolatyn», - dep atap ótti N.Sarybaev. Onyń málimetinshe, atalǵan qor 2005 jyldan beri aýyldyq shaǵyn nesıeleý arqyly aýyl turǵyndarynyń qarjy resýrstaryna qoljetimdiligin arttyrý boıynsha qyzmet atqarady. «QazAgro» holdınginiń kópdeńgeıli júıesinde Qor birinshi orynda kele jatyr. «Jalpy, 2005 jyldan 2014 jylǵy 1 tamyzǵa deıin Qor tarapynan 78,6 mlrd. teńgege 85,8 myń nesıe berildi. Onyń ishinde osy jyly 5,7 myń adam 16,4 mlrd. teńgeniń nesıesin alǵan. Búgingi tańda Qordyń nesıe qorjyny 49 mlrd. teńgeni qurap, 22 200 belsendi azamat qaryz aldy», - dep atap ótti Qor basshysy. Onyń málimetinshe, Qor aýyl kásipkerlerin shaǵyn nesıeleý boıynsha negizgi ınstıtýt bolyp tabylady. Byltyr aýyldyq kásipkerlikti shaǵyn nesıeleý naryǵynda Qordyń úlesi - 32,6 paıyzdy (22,7 mlrd. teńge) qurady. Aıta keteıik, aýyl turǵyndaryn Qor qyzmetimen qamtýdy keńeıtý úshin 2013-2014 jyldary Aqmola, Almaty, Shyǵys Qazaqstan fılıaldary janynan Astana, Taldyqorǵan, Semeı qalalarynda bólimsheler ashyldy. Olar nesıeleýdiń tolyq tsıklin oryndap, jaqyn ornalasqan aýdandar turǵyndaryna da keńes berýden nesıe berýge deıin qyzmetter kórsetýde.
