Aýyl sharýashylyǵyn qarjylaı qoldaý qory Agrarlyq nesıe korporatsııasyna qosylady

NUR-SULTAN. QazAqparat – QR Premer-Mınıstri Asqar Mamın «Báıterek» ulttyq basqarýshy holdıngi» AQ Dırektorlar keńesiniń otyrysyn ótkizdi, dep habarlaıdy primeminister.kz.

Memleket basshysy Qasym-Jomart Toqaevtyń Holdıngtiń enshiles kompanııalarynyń sanyn qysqartý jónindegi tapsyrmasyn oryndaý maqsatynda «Aýyl sharýashylyǵyn qarjylaı qoldaý qory» AQ-nyń (AShQQQ) «Agrarlyq nesıe korporatsııasy» AQ-ǵa (ANK) qosylýy týraly sheshim qabyldandy.

ANK-ǵa AShQQQ-nyń mıkrobıznesti kredıtteý, ósimdik sharýashylyǵyndaǵy saqtandyrý fýnktsııalary jáne «Dıplommen aýylǵa» jobasy aıasynda «Aýyldyq ıpoteka» boıynsha agent fýnktsııalary, «Damý» qoryna – kredıtterdi kepildendirý boıynsha AShQQQ fýnktsııalary beriletin boldy.

Qaıta uıymdastyrý aýyl sharýashylyǵy taýaryn óndirýshilerge ANK keń fılıaldyq jelisi bazasynda «bir tereze» qaǵıdaty boıynsha kredıtter alýǵa múmkindik beredi.

Bul rette AÓK sýbektilerin qarjylandyrýdyń qoldanystaǵy sharttary saqtalady. Otyrysqa qatysýshylar bıylǵy jyldyń II toqsanyndaǵy táýekelder jónindegi esepti, sondaı-aq Holdıngtiń basqarmasy, Dırektorlar keńesi, Korporatıvtik hatshysy jáne Korporatıvtik hatshynyń qyzmeti týraly erejelerge ózgerister men tolyqtyrýlardy bekitti.