Aýyl sharýashylyǵy júıesinde jemqorlyq qylmystarǵa jol ashatyn osal tustar óte kóp - A. Mamytbekov
«Búginde Aýyl sharýashylyǵy mınıstrligi atqaryp otyrǵan kóptegen sharýalar bar. Solardyń barlyǵynda ashyqtyqty qamtamasyz etý maqsatynda búgingi kelisimge kelip otyrmyz. Bizge bul memorandým óte qajet. Óıtkeni qoǵam qazir keıbir jaǵdaıda sheneýnikterdiń sózine sene bermeıdi. Sondyqtan tikeleı jumysqa qatysy joq, úshinshi tarap retindegi birlestiktiń baqylap otyrǵany qoǵamǵa da úlken senim uıalatady», - dep atap ótti shara barysynda QR Aýyl sharýashylyǵy mınıstri Asyljan Mamytbekov. Onyń aıtýynsha, 2013 jylmen salystyrǵanda ótken jyly jemqorlyq boıynsha qylmystyq jazaǵa tartylǵandardyń sany 45%-ǵa azaıǵan. «Degenmen, jasyratyny joq, aýyl sharýashylyǵy júıesinde jemqorlyq qylmystarǵa jol ashatyn osal tustar óte kóp. Máselen, sýbsıdııa berý barysyn aıtýǵa bolady. Qazirgi kezde sýbsıdııalardyń kóptegen mólsheri jergilikti atqarý organdaryna berilgen. Ony qoǵam bile bermeıdi. Al endi aýyl sharýashylyǵyna sýbsıdııa durys berilmeı jatyr degen áńgime shyqsa, barlyǵy AShM durys jumys jasamaı otyr dep oılaıdy. AShM qyzmetkerleri jemqorlyqpen aınalysyp jatyr dep túsinedi. Biraq qatelikter jergilikti atqarý organdarynyń, solardyń aýyl sharýashylyq bólimderiniń qyzmetkerlerinen ketedi. Al olar bizdiń júıemizge kirmeıdi», - dep túsindirdi mınıstr. Óz kezeginde «Jańarý» birlestiginiń tóraǵasy Oralbaı Ábdikárimov mınıstrlikpen birge memlekettik qyzmetkerlerdiń qoǵam aldyndaǵy bedelin kóterip, jemqorlyqtyń aldyn alýda yntymaqtasa qyzmet etýge ázir ekendikterin málim etti. «Qazir bizdiń qoǵamda memlekettik qyzmetker mindetti túrde urlyqqa, jemqorlyqqa barady degen teris pikir qalyptasqan. Árıne, ondaılar joq dep aıta almaımyz. Biraq bizdiń maqsatymyz -Memleket basshysy alǵa qoıyp otyrǵan jemqorlyqqa qarsy saıasatyn oryndaýǵa atsalysý. Osy memorandým aıasynda jergilikti aýyl sharýashylyq bólimderimen de tyǵyz qarym-qatynas ornatýǵa ázirmiz», - dedi ol.