Aýyl sharýashylyǵy jalpy óniminiń kólemi aǵymdaǵy jyldyń 9 aıynda 22 paıyzǵa artty - QR Aýyl sharýashylyǵy mınıstri
TANA. 11 qarasha. QazAqparat /Marlan Jıembaı/ - Aýyl sharýashylyǵy jalpy óniminiń kólemi aǵymdaǵy jyldyń 9 aıynda 22 paıyzǵa artty.
Bul týraly búgin el táýelsizdiginiń 20 jyldyǵyna arnalǵan Agroónerkásip kesheni qyzmetkerleriniń forýmynda QR Aýyl sharýashylyǵy mınıstri Asyljan Mamytbekov málim etti.
«Aýyl sharýashylyǵy jalpy óniminiń kólemi aǵymdaǵy jyldyń 9 aıynda 22 paıyzǵa artty. Bul ekonomıkanyń 7 paıyzdyq ósimine qol jetkizý boıynsha alǵa qoıylǵan mindetti oryndaýǵa óz úlesin qosady», - dedi ol. Mınıstrdiń atap ótýinshe, 2011 jyly aýyl sharýashylyǵy jalpy óniminiń óndiris kólemi 1 qyzmetkerge 5 myń AQSh dollaryn quramaq. Bul 2005 jylǵy deńgeıge qaraǵanda, shamamen 2 esege joǵary. Sonymen qatar, elimizdiń eksporttyq áleýeti aǵymdaǵy jyly astyqtyń bitik shyǵýyna oraı 3 esege deıin artpaq.
«Osynyń barlyǵy týelsiz Qazaqstannyń aýyl sharýashylyǵy óndirisindegi tabystaryn aıqyn kórsetedi jáne Nursultan Ábishuly, bul Sizdiń agrarlyq saıasattaǵy strategııalyq baǵytyńyzdyń aıqyndyǵyn dáleldeıdi. Bul álemde azyq-túlik óndirýshileriniń biri retinde Qazaqstannyń bolashaǵy týraly senimmen aıtýǵa múmkindik beredi», - dedi A.Mamytbekov.
