Aýyl sharýashylyǵy zamanaýı ǵylymǵa súıenbese, qurdymǵa ketedi – Joldaý

ASTANA. QazAqparat – Prezıdent Qasym-Jomart Toqaev Parlament palatalarynyń birlesken otyrysynda agroǵylymdy damytý jóninde tapsyrmalar berdi, dep habarlaıdy QazAqparat tilshisi.

«Qazirgi aýyl sharýashylyǵy – joǵary tehnologııaly sala. Sharýalardy jer jaǵdaıy nemese aýa raıy emes, ınnovatsııalyq amal-tásilder tabysqa jetkizedi. Zamanaýı ǵylymǵa súıenbese, aýyl sharýashylyǵy jaı toqyraýǵa emes, qurdymǵa ketedi. Agroǵylymdy damytý jáne eń bastysy, ony aýyl sharýashylyǵynda is júzinde qoldaný úshin sharalar qabyldaý qajet», - dedi Memleket basshysy.

Prezıdent ulttyq agrarlyq ǵylymı bilim berý ortalyǵyn zertteý isiniń barlyq satysyn qamtıtyn agrotehnologııa habyna aınaldyrý keregin jetkizdi.

«Sondaı-aq sheteldiń tanymal agro-ǵylymı ortalyqtarymen tolyqqandy ǵylymı-tájirıbelik yntymaqtastyq ornatý kerek. Biz jeke ǵylymı-tehnologııalyq bastamalardy qoldaımyz. Bilim baǵdarlamalaryn aýyl sharýashylyǵy talaptaryna beıimdeımiz», - dedi Qasym-Jomart Toqaev.

Prezıdent elimiz úshin sýdyń mańyzy munaı, gaz nemese metaldan kem emes ekenin, sondyqtan Sý resýrstary jáne ırrıgatsııa mınıstrligi qurylatynyn aıtty.

Buǵan deıin Prezıdent aldaǵy úsh jylda agroónerkásiptegi óńdelgen ónim úlesin 70% jetkizý kerektigin aıtqan edi.

Sondaı-aq, eldegi aýyl sharýashylyǵy tehnıkasynyń 80 paıyzy tozyp tur, jyl saıyn onyń 8-10 paıyzyn jańartyp otyrý qajet.