Aýyl sharýashylyǵy tehnıkasyn jeńildetilgen lızıngke berý baǵdarlamasy bastalady

NUR-SULTAN. QazAqparat – «Báıterek» ulttyq basqarýshy holdıngi» AQ Indýstrııa jáne ınfraqurylymdyq damý, Aýyl sharýashylyǵy jáne Ekologııa, geologııa jáne tabıǵı resýrstar mınıstrlikterimen birlese aýyl sharýashylyǵy tehnıkasyn jeńildetilgen lızıngke berý baǵdarlamasyn iske qosady, dep habarlaıdy QazAqparat.

Baǵdarlamanyń qarjylyq operatorlary – «Ónerkásipti damytý qory» AQ jáne «QazAgroQarjy» AQ.

Aýyl sharýashylyǵy tehnıkasyn jeńildetilgen lızıngke berý baǵdarlamasyn iske asyrý úshin 40 mlrd. teńge bólinedi, onyń 30 mlrd teńgesin «Ónerkásipti damytý qory» AQ «Jasyl Damý» (ÓKM operatory) AQ qarajatynan jáne 10 mlrd teńgesin «QazAgroQarjy» AQ kapıtal naryǵynan tartady.

Baǵdarlamaǵa qatysý úshin ótinimderdi qabyldaý «QazAgroQarjy» AQ-nyń barlyq fılıaldarynda aǵymdaǵy jyldyń 5 tamyzynda bastalady.

Ótinimderdi qaraýdy, sondaı-aq otandyq óndiristegi aýyl sharýashylyǵy tehnıkasyn lızıngke berýdi «QazAgroQarjy» AQ kelesi sharttarda júzege asyrady:

1. Lızıng merzimi – 10 jylǵa deıin;

2. Syıaqy mólsherlemesi – jyldyq 6%;

3. Lızıng boıynsha bastapqy jarna (avanstyq tólem) – lızıng nysanasy qunynyń 0%;

4. Negizgi boryshty óteý boıynsha jeńildik kezeńi – 1 jyl;

5. Qarjylandyrý kólemi – bir lızıng alýshyǵa 205 000 000 (eki júz bes mıllıon) teńgeden jáne bir lızıng alýshyǵa aýyl sharýashylyǵy tehnıkasynyń úsh birliginen artyq emes.

Sondaı-aq, qarjylandyrýdyń bir lızıng alýshyǵa eki jyldyq kezeń ishinde bir retten jıi emes usynylýy - mańyzdy shart.

Baǵdarlamaǵa kelesi otandyq óndiristegi ózdiginen júretin aýyl sharýashylyǵy tehnıkalary qatysady:

• LOVOL, DEUTZ FAHR, TURAN, KIROVETs, BELARÝS, RSM, YTO, CLAAS XERION, DONG FENG, WUZHENG markaly traktorlar;

• ESSIL, VECTOR, ACROS, TORUM, CLAAS TRION, DEUTZ FAHR markaly astyq jınaıtyn kombaındar (kúrish kombaındary);

• Súrlem jınaıtyn kombaındar: jemshóp jınaıtyn joǵary ónimdi kombaın (JJK), jemshóp jınaıtyn ózdiginen júretin kombaın (JÓK).

Aýyl sharýashylyǵy tehnıkasyn óndirýshilerdiń tizimine: «AgromashHoldıng KZ» AQ, «Qostanaı traktor zaýyty» JShS, «Qazaqstan Agro ınnovatsııalyq korporatsııasy» JShS, «SemAZ» JShS, «Kazrost Engineering Ltd.» JK, «ST ESEMBLI» JShS, «KazKioti» JShS, «MTZ-Qazaqstan mashına jasaý zaýyty» JShS kiredi.

Aýyl sharýashylyǵy tehnıkasyn jeńildetilgen lızıngke berý baǵdarlamasy shegindegi qarjylandyrýdyń revolverlik sıpatta bolatynyn, ıaǵnı qoldanystaǵy lızıngti óteýden túsetin tólemderdiń jańa qarjylyq lızıng sharttaryn jasasýǵa qaıta jiberiletinin aıta ketý kerek. Baǵdarlamanyń ózi 20 jylǵa eseptelgen.