Aýyl sharýashylyǵy tehnıkasy eki ese qymbattaǵan

NUR-SULTAN. QazAqparat – Aýyl sharýashylyǵy tehnıkasy eki ese qymbattady. Bul týraly sharýalardyń máselelerin baıandaǵan «Atameken» UKP Agroónerkásip kesheni komıtetiniń tóraǵasy Jıgýlı Daırabaev málimdedi, dep habarlaıdy QazAqparat tilshisi.

«Otandyq aýyl sharýashylyǵy tehnıkalaryn jasaýdy durys qolǵa alýymyz kerek. Táýelsiz el bolǵanymyzǵa 30 jyldan asty. Barlyq iri kombaındar men aýyr tehnıkalardy Qazaqstanǵa jınap alyp, ózimizde shyǵaraıyq deýden aýlaqpyz. Degenmen de, qarapaıym soqa, dán sepkish, tyrma sııaqty tehnıkany ózimizde 6-7 zaýytta jasaýǵa bolady ǵoı. Endi tehnıkanyń baǵasyn aıtaıyn. K-730 degen úlken traktor bar. Ony otandyq dep aıtaıyn. Óıtkeni, ony alyp kelip, Qazaqstanda jınaımyz. Byltyr ol traktor 46 mln turatyn. Al, bıyl onyń quny 92 mln teńge boldy. 2 ese qymbattady. Máselen, Acros, Vector degen kombaındar bar. Byltyr olar 50-55 mln bolatyn. Bıyl 114 mln-ǵa deıin qymbattap ketti», - dedi Jıgýlı Daırabaev.

Sonymen qatar, kásipkerler palatasynyń ókili aýyldarǵa jastardy tartý máselesin kóterdi. Onyń aıtýynsha, oqý bitirgen jas maman aýylǵa barǵysy kelmeıdi. Al, eldi mekenderdegi qalany azyq-túlikpen qamatamasyz etip otyrǵan kásiporyndarda jumys kúshi jetispeıdi. Suranys joǵary. Tıisinshe, dúken sórelerindegi taýardyń baǵasy ósedi. Agroónerkásip kesheni komıtetiniń tóraǵasy aýyldardan jastar údere kóship, keıingi jyldary elimizde 1 300-den astam aýyl jabylyp qalǵanyna nazar aýdardy.