Aýyl sharýashylyǵy tehnıkalaryn satyp alýǵa jeńildetilgen nesıe beriledi
ASTANA. QazaAqparat - Búgin Elbasy tapsyrmasyn oryndaý maqsatynda QR Premer-Mınıstriniń orynbasary - QR Aýyl sharýashylyǵy mınıstri Asqar Myrzahmetov jumys saparymen negizgi astyqty ólkeniń biri - Qostanaı oblysyna bardy, dep habarlaıdy mınıstrliktiń baspasóz qyzmeti.
QR Aýyl sharýashylyǵy mınıstri jumys sapary barysynda Qazaq aýyl sharýashylyǵyn mehanıkalandyrý jáne elektrlendirý ǵylymı-zertteý ınstıtýtynda bolyp, aýyl sharýashylyǵy tehnıkalarynyń jańa túrlerimen tanysty.
Ol osy jyldan bastap otandyq óndirýshilerden aspaly-tirkemeli aýyl sharýashylyǵy tehnıkalaryn lızıngke alý úshin jeńildetilgen nesıe baǵdarlamasy iske asyrylatynyn atap ótti (shaǵyn mehanıkalandyrý). Bul maqsatqa 5,5 % mólsherlememen 5 mlrd teńge kóleminde qarjy qarastyrylǵanyn da aıta ketti.
