Aýyl sharýashylyǵy taýaryn óndirýshilerge janarmaıdy 50 paıyzǵa deıin arzandatyp berý qajet - Q. Aıtahanov
ASTANA. 7 sáýir. QazAqparat /Qanat Mámetqazyuly/ - Aýyl sharýashylyǵy taýarlaryn óndirýshilerge janar-jaǵarmaıdy 50 paıyzǵa deıin arzandatyp berý qajet.
Búgin QR Parlamenti Senatynyń jalpy otyrysynda «Belarýs Respýblıkasynyń, Qazaqstan Respýblıkasy men Reseı Federatsııasynyń munaı men munaı ónimderiniń ortaq naryqtaryn uıymdastyrý, basqarý, olardyń jumys isteý jáne damý tártibi týraly kelisimdi ratıfıkatsııalaý týraly» QR Zańyn talqylaý barysynda depýtat Qýanysh Aıtahanov osylaı málim etti.
«Qazir barlyq óńirde aýyr sharýashylyǵy taýarlary, onyń ishinde azyq-túlik taýarlarynyń baǵasy ósip otyr. Bunyń ártúrli sebepteri bar bolǵanymen, negizgi bir sebebi ónimderdiń ózindik qunynyń joǵarylaýynda. Al ol qunnyń úshten birin munaı ónimderiniń baǵasy quraıdy. Munaı ónimderiniń baǵasy neǵurlym joǵary bolsa, azyq-túlik ónimderiniń baǵasy da soǵurlym joǵary», - dedi senator. Sonymen qatar, depýtat elimizden jyl saıyn 80-85 mln. tonna munaı óndiriletinin aıta kele, aýyl sharýashylyǵy salasyna bunyń 1-1,5 paıyzy ǵana ketetinin tilge tıek etti. «Endeshe osy 1-1,5 paıyz munaı ónimin nege 50 paıyzǵa deıin arzandatyp bermeske. Bul tabıǵattyń halqymyzǵa bergen syıy ǵoı. Endeshe osyndaı múmkindik bola tura ony tıimdi paıdalanýǵa tıispiz. Osylaı 50 paıyzǵa arzandatyp bersek, azyq-túlik baǵasy da sonshalyqty tómendegen bolar edi», - dedi Q. Aıtahanov.
