Aýyl sharýashylyǵy taýaryn óndirýshilerge 2 paıyzdyq nesıe berý kerek - Tóleýtaı Rahymbekov
Damby aýylynda ótken kezdesýge qatysqan «Aýyl» halyqtyq-demokratııalyq patrıottyq partııasy tóraǵasynyń birinshi orynbasary Tóleýtaı Rahymbekovtiń aıtýynsha, agroónerkásip kesheni men aýyldardyń problemasyn bólek qarastyrýǵa bolmaıdy.
«Memleket tarapynan qoldaý az emes. Jyl saıyn memlekettik baǵdarlama aıasynda aýyl sharýashylyǵyn damytýǵa 350-400 mlrd teńge bólinedi. Ókinishke oraı, búgingi tańda bul bólingen qarajattyń tıimdiligi baıqalyp otyrǵan joq. Ónimniń 60-65%-yn shyǵaratyn usaq sharýashylyqtar osy qarjynyń tek 5%-yn paıdalanady. Fermalardy qoldaý baǵdarlamalary mınıstr aýysqan saıyn ózgeredi. Agrarlyq saıasattyń turaqsyzdyǵy baıqalady. Master-josparlarǵa, agrokartalarǵa, azyq-túlik beldeýin qurýǵa, et eksporty baǵdarlamasyna qomaqty qarjy salynǵanyna qaramastan, tıimdigi bar bastamalar men ıdeıalar sońyna deıin jetkizilmeıdi», -deıdi «Aýyl» halyqtyq-demokratııalyq patrıottyq partııasy tóraǵasynyń birinshi orynbasary Tóleýtaı Rahymbekov.
Onyń pikirinshe, aýyl sharýashylyǵy óniminiń 40%-y qaıta óńdeýden ótkiziledi. Al, qalǵany shıkizat túrinde shetelge satylady.
«Osyǵan baılanysty «Aýyl» partııasy aýyl sharýashylyǵy taýaryn óndirýshilerge 2%- ben uzaq merzimdi nesıe berýdi usynady. Osyndaı qoldaý kórsetilse ǵana aýyl sharýashylyǵy taýarlaryn óndirýdi jandandyryp, salany damyta alamyz» - degen pikirin bildirdi Tóleýtaı Rahymbekov.
Sondaı-aq ol Qazaqstan Respýblıkasynyń aýdandyq mańyzy bar qalalary, aýyldyq okrýgteri, kentteri men aýyldary ákimderin aldaǵy saılaýda partııadan kandıdattardy qoldaýǵa shaqyrdy.
Eske sala ketelik, budan buryn Atyraýdaǵy Damby aýylynda ákim saılaýyna 7 úmitker usynylǵanyn habarlaǵan edik.