Aýyl sharýashylyǵy sýbsıdııalaryn alýda memlekettik qyzmetter avtomattandyrylmaq

  ASTANA. QazAqparat - Qazaqstanda aýyl sharýashylyǵy sýbsıdııalaryn alý boıynsha barlyq memlekettik kórsetiletin qyzmetter jyl sońyna deıin avtomattandyrylady. Bul týraly búgingi Úkimet otyrysynda QR Aýyl sharýashylyǵy vıtse-mınıstri Arman Evnıev málim etti, dep habarlaıdy QazAqparat tilshisi.

Agroónerkásiptik keshen salasyndaǵy tsıfrlyq saýattylyq boıynsha atqarylǵan jumystardy baıandaǵan Arman Evnıev sharýalardy tsıfrlyq saýattylyq daǵdylaryna úıretý tórt baǵyt boıynsha júrgizilgenin atap ótti. Naqtyraq aıtqanda, elektrondyq memlekettik kórsetiletin qyzmettermen jumys isteý daǵdylaryna oqytý, tanaptardyń elektrondyq kartalaryn toltyrýdy úıretý, tsıfrlyq tehnologııalarmen jumys isteýdi úıretý jáne kooperatıvterge aýyl sharýashylyǵy janýarlaryn birdeılendirý aqparattyq júıesin qoldanýdy oqytý joldary qolǵa alynǵan.

«Sharýalarǵa tyńaıtqyshtardy sýbsıdııalaýǵa ótinim berý kezinde kórsetiletin qyzmetterdi qalaı alý kerektigin úıretý jumystary júrgizildi. Osy baǵytta 40 myń sharýany oqytý mindeti qoıylǵan edi. Búgingi tańda 29 623 sharýany oqytý júrgizilip qoıdy. Bul kórsetkishke tek bir memlekettik kórsetiletin qyzmet boıynsha qol jetkizildi. Jyldyń aıaǵyna deıin aýyl sharýashylyǵy sýbsıdııalaryn alý boıynsha barlyq memlekettik kórsetiletin qyzmetterdi avtomattandyrý kózdelip otyr», - deıdi vıtse-mınıstr.

Onyń aıtýynsha, aýyl sharýashylyǵy mınıstrligi óz aldyna tanaptardyń elektrondyq kartalaryn toltyrý boıynsha 15 myń sharýany oqytý mindetin qoıǵan.

«Qazirgi kezde 66 230 sharýa oqytylǵanyn eskere otyryp, bul kórsetkish iske asyrylǵanyn habarlaımyz», - dedi Arman Evnıev.