Aýyl sharýashylyǵy salasyndaǵy jyl saıynǵy óndiris ósiminiń qarqyny 5-7 paıyzdy qurap otyr

Búgin «Kedendik odaq elderiniń agroónerkásiptik keshenin damytýdy ǵylymmen qamtamasyz etý» atty halyqaralyq ǵylymı-tájirıbelik konferentsııa barysynda baıandama jasaǵan QR Aýyl sharýashylyǵy mınıstrligi Strategııalyq josparlaý jáne ınnovatsııalyq saıasat departamentiniń dırektory Núrken Shábıev osylaı málim etti, dep habarlaıdy QazAqparat.

«Qazaqstannyń agroónerkásip kesheni el ekonomıkasynyń basty sektorlarynyń biri bolyp tabylady ári osy salanyń damýy tek azyq-túlik qaýipsizdigi deńgeıi boıynsha ǵana emes, memlekettiń qoǵamdyq-saıası turaqtylyǵy turǵysynan da mańyzdy bolyp otyr. Búgingi kúni aýyl sharýashylyǵy óndirisiniń jalpy ishki ónimdegi úlestik salmaǵy 6 paıyzdy quraıdy. Al jyl saıynǵy óndiris ósiminiń qarqyny 5-7 paıyz shamasynda. Tek, byltyrǵy jyly álemdik qarjylyq daǵdarystyń teris saldaryna qaramastan agrarlyq sala damýdyń turaqty qarqynyn saqtap, 113 paıyzdyq kórsetkishke qol jetkizdi. Bunyń ózi sońǵy 8 jyl boıynsha rekordtyq kórsetkish», dedi N. Shábıev.

Onyń aıtýynsha, byltyrǵy jyly aýyl sharýashylyǵy daqyldarynyń barlyq túrleri boıynsha joǵary túsim jınalǵan. Máselen, astyqtyń jalpy jıyny onyń aldyndaǵy jylmen salystyrǵanda 35 paıyzǵa, maıly daqyldar túsimi 70 paıyzǵa artqan. Al kúrishtiń jalpy jıyny byltyrǵy kórsetkish boıynsha - 23 paıyzǵa, kartop 19 paıyzǵa ósken.