Aýyl sharýashylyǵy salasynda jemqorlyq asqynyp turǵan óńirler belgili boldy
ASTANA. QazAqparat - Búgin QR Memlekettik qyzmet jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev aýyl sharýashylyǵy salasynda jemqorlyq asqynyp turǵan óńirlerdi atady, dep habarlaıdy QazAqparat.
«2016 jyldyń qorytyndysy boıynsha aýyl sharýashylyǵy salasyndaǵy jemqorlyq Ońtústik Qazaqstan, Shyǵys Qazaqstan, Jambyl jáne Almaty oblystarynda asqynyp turǵany belgili boldy», - dedi ol «Atameken» Ulttyq kásipkerler palatasynda ótken selekorlyq rejimdegi keńes barysynda.
Onyń atap ótýinshe, aǵymdaǵy jyldyń birinshi toqsanynda ǵana aýyl sharýashylyǵy salasy qyzmetkerlerine qatysty 28 qylmystyq is qozǵalǵan.
«Eger ótken jyly aýyl sharýashylyǵy salasynda 24 is qozǵalǵanyn eskersek, bıylǵy derekterden jemqorlyq qylmystardy tirkeý faktileriniń birshama arta túskendigin baıqaýǵa bolady», - dedi Alık Shpekbaev.
Sonymen qatar ol sońǵy 5 jylda elimizde aýyl sharýashylyǵy salasynda bólinetin sýbsıdııa kólemi úsh esege ulǵaıyp, 8,9 mlrd. teńgeden 257 mlrd. teńgege jetkendigin atap ótti.
