Aýyl sharýashylyǵy salasynda sýbsıdııalaýdy baqylaý kúsheıtildi - Roman Sklıar
«Agroónerkásipti sýbsıdııalaý mehanızmin jetildirip jatyrmyz. Memlekettik organdar, qoǵam, agrobıznes ókilderi jáne Parlament depýtattarynan turatyn jumys toby quryldy. Sýbsıdııalaýdyń eń utymdy nusqasy ázirlendi. Onyń tıimsiz degen 10 túri alynyp tastaldy. Óıtkeni, onda jemqorlyq kóp, bóliný tártibi ashyq emes. Qazir sýbsıdııalaý baǵdarlamasyn baqylaý kúsheıtilip, kedergiler joıyldy», - dedi ol Senattyń jalpy otyrysynda.
Aıtýynsha, sýbsıdııa berý protsesi tsıfrlyq platformaǵa kóshirilip jatyr. Ol memlekettik derekter bazasyna qosylǵan.
«Bári ashyq, ıaǵnı sýbsıdııa bólý kezinde jemqorlyqqa jol berilmeıdi. Bul platforma fermerler úshin tegin bolady. Aýyl sharýashylyǵy mashınalaryn jasaý, tuqym jáne qyzylsha sharýashylyǵy, qant ónerkásibin qoldaý kúsheıtildi. Sýbsıdııa alýshylarǵa da naqty mindetter júkteledi. Munyń barlyǵy sýbsıdııa berý júıesin odan saıyn jaqsartady dep senemiz», - dedi Premer-Mınıstrdiń birinshi orynbasary.
Sondaı-aq, R. Sklıar selektsııa men tuqym sharýashylyǵyn damytýdyń jospary ázirlengenin aıtty. Tuqym sapasyn baqylaıtyn jáne sertıfıkattaıtyn arnaıy organ qurylady. Oǵan qosa, kelesi jyly ósimdikterdiń jańa sorttaryn qorǵaý jónindegi halyqaralyq konventsııaǵa qosylamyz.
Sonymen qatar, memlekettik oqý granttarynyń sany ósken. Aýyl sharýashylyǵy mamandyqtaryna 36 paıyzǵa, veterınarııaǵa 12 paıyzǵa, sondaı-aq aýyl kvotasy da ósti.
«Agrarlyq ǵylymdy qoldaýǵa jyl saıyn 8-9 mlrd teńge bólinip keledi. Elimizdiń úsh agrarlyq joǵary oqý ornynda halyqaralyq standarttarǵa saı bilim berilip jatyr. Oqý baǵdarlamalaryn ázirleýge aýyl sharýashylyǵy, veterınarııa sarapshylary jáne jumys berýshiler qatysyp otyr», - dedi R. Sklıar.
