Aýyl sharýashylyǵy salasynda kelimsek jumyskerler nege kóp

NUR-SULTAN. QazAqparat – Elimizde aýyl sharýashylyǵy salasynda nelikten gastarbaıterler kóp. Bul suraqqa QR Іshki ister mınıstrligi Kóshi-qon komıteti tóraǵasynyń orynbasary Sabyrjan Seıitjanov jaýap berdi, dep habarlaıdy QazAqparat tilshisi.

«Bul jerde másele jumys kúshiniń jetispeýinen emes, bizdiń azamattar aýyl sharýashylyǵynda jumys istegisi kelmeıdi, onyń ústine jalaqysy az. Eldegi jumyssyz azamattardyń ózi jalaqysyn azsynyp, bul salada jumys istegisi kelmeıdi. Al Ózbekstan azamattary aýyl sharýashylyǵynda qýana jumys isteýge daıyn tur», - dedi S. Seıitjanov OKQ-de tilshilerdiń suraǵyna jaýap bere otyryp.

Buǵan deıin Kóshi-qon komıtetiniń ókili, sheteldik eńbek mıgranttarynyń zańdy túrde qalaı jumys isteı alatyny týraly aıtyp berdi.

Odan bólek, atalǵan baspasóz máslıhatynda Azamattyǵy joq máseleler jónindegi óńirlik keńesshi, BUU Bosqyndar isteri jónindegi joǵary komıssar basqarmasynyń Ortalyq Azııa boıynsha ókili Roman Marın Qazaqstanda azamattyǵy joq 7 myń adamnyń tirkelgenin málim etti.

«Biz Qazaqstan Respýblıkasynda ár adamnyń jeke quqyǵy qorǵalyp, onyń azamattyǵyn zańdastyrýda barlyq múmkindik qarastyrylǵanyna senimdimiz. Ótken jyldyń sońynda Qazaqstan aýmaǵynda azamattyǵy joq 7 myń adam tirkeldi. Aıtyp ótken jón, «azamattyǵy joq» mártebesin resmı túrde alǵan adam, zań aıasynda óz quqyǵyn qorǵap, azamattyǵy bar adamdarmen birdeı múmkindikterdi qoldana alady. Qazaqstanda bul baǵyttaǵy jumystardy ІІM quzyrly jáne úkimettik emes uıymdarmen birlesip atqaryp jatqan eńbegi óz jemisin berip jatyr. Biz de óz tarapymyzdan azamattyǵy joq adamdarǵa jan-jaqty qoldaý kórsetýge ázirmiz», - deıdi ol.