Aýyl sharýashylyǵy salasynda ınvestıtsııalyq jobalardy iske asyrýǵa 1,5 trln. teńgege jýyq qarajat baǵyttaý kerek

ASTANA. QazAqparat - Aýyl sharýashylyǵy salasyn aldaǵy ýaqytta qarjylandyrýǵa aıtarlyqtaı qajettilikter bar. QR Aýyl sharýashylyǵy mınıstrliginiń 2020 jylǵa deıin bekitken josparlaryna sáıkes basymdyq berilgen ınvestıtsııalyq jobalardy iske asyrýǵa 1,5 trln. teńgege jýyq qarajat baǵyttaý kerek. Bul týraly «QazAgro» holdınginiń baspasóz qyzmetinen habarlandy.

Aıta keterligi, «QazAgro» kompanııasy men QR Ulttyq banki arasynda Biryńǵaı jınaqtaýshy zeınetaqy qorynyń qarajatyn uzaqmerzimdi kezeńge tartý múmkindigi boıynsha kelissózder júrgizilgen. Nátıjesinde, Ulttyq bank 2015 jyly «QazAgro» Biryńǵaı jınaqtaýshy zeınetaqy qory esebinen 80 mlrd. teńge somasyna qarjylandyrylatynyn málimdegen.

Osyǵan baılanysty, «QazAgro» holdıngi Biryńǵaı jınaqtaýshy zeınetaqy qorynyń qarajaty jumsalatyn baǵyttar boıynsha túsinik berdi. «Damýdyń basym baǵyttarynyń ishinde - jemis-kókónis sharýashylyǵy, ıntensıvti baqsha sharýashylyǵy, et jáne sútti mal sharýashylyǵy, qus sharýashylyǵy, jem-shóp sharýashylyǵy, melıoratsııa jáne aýyl sharýashylyǵy ónimderiniń qaıta óndirisi sekildi salalar bar. Mınıstrlik bekitken josparlardy iske asyrýdyń negizgi maqsaty - ımportqa táýeldilikti tómendetý jáne otandyq agroónerkásiptik keshen ónimderiniń eksportyn ulǵaıtý, sonymen qatar aýyldaǵy shaǵyn jáne orta bıznestegi jańa jumys oryndaryn qalyptastyrý. Aldyn ala esep boıynsha kózdelgen barlyq josparlardyń iske asyrylýy 2015 jyldyń ózinde ǵana 30 myń adamdy jumyspen qamtıdy», delingen baspasóz baıanynda.

Budan bólek, «QazAgro» holdıngi Memleket basshysynyń tóraǵalyǵymen ótken Úkimettiń keńeıtilgen otyrysynda agroóndiristik keshendi damytýdy qoldaý sheńberinde AÓK sýbektilerin qarjylyq saýyqtyrý jumystaryn jalǵastyrý týraly naqty tapsyrma berilgenin alǵa tartady. Bul rette atalǵan qoldaý kólemin 500 mlrd. teńgege deıin ulǵaıtý tapsyrylǵan.