Aýyl sharýashylyǵy salasyna qarjy jetpeı otyr - alqa májilisi

ASTANA. QazAqparat - Aýyl sharýashylyǵy salasynan eń aldymen qarajat jetkiliksizdigi seziledi. Bul týraly QR Aýyl sharýashylyǵy mnıstrliginde ótken alqa májilisinde mınıstr Ómirzaq Shókeev málim etti, dep habarlaıdy «QazAqparat» HAA tilshisi.

«Álbette, 2018 jyly qandaı jumystardy atqaramyz degen máseleniń biz úshin mańyzy zor. Sońǵy eki aıda aýyl sharýashylyǵy salasyn jan-jaqty, jiti zerttegen meniń baǵamdaýymsha, aýyl sharýashylyǵy salasynda jaǵdaı ońaı emes. Eń birinshiden, salada qarajat jetkiliksizdigi seziledi. ıAǵnı, memlekettik baǵdarlama boıynsha aýyl sharýshylyǵy salasyna 1 trıllıon teńge bólý qarastyrylǵan. Biraq, buǵan deıingi baǵdarlama 1 trıllıon 400 mıllıard teńge bólýdi qarastyrǵan bolatyn. Demek, jańa baǵdarlama qabyldaı otyryp, biz qalaıda bul salaǵa bólinetin qarjyny azaıtyp jiberdik. Tipti eki devalvatsııany ótkergenimizdi eskersek, onda memlekettik qoldaý kezindegi qoldaýdyń úshten birin ǵana qurap otyr», - deıdi mınıstr.

Ómirzaq Shókeevtiń aıtýyna qaraǵanda, bankter daǵdarys dep, salany qarjylandyrýdy kúrt tómendetken.

«Salanyń óziniń qaıtarymy da máz bolmaı tur. Ekinshi deńgeıdegi bankterdiń nesıe berýi azaıyp barady. Sýbsıdııalar ósip bara jatsa da, tıimdiligi jaǵynan suraqtar bar. Ótken jyly sýbsıdııa tómendetildi. Buǵan qosa 15 sýbsıdııanyń tıimsiz ekenine kóz jetkizip otyrmyz. Biraq, bul jaǵdaı sýbsıdııany azaıta otyryp, sektorǵa bóliner qarjyny azaıtýymyz kerek degendi bildirmeıdi. Biz bul qarajattardy basqa baǵytqa joldaımyz», - deıdi ol.

Mınıstrdiń óz sózinde aýyl sharýashylyǵyn nesıeleý úshin jańa quraldardy engizý kerektigin qadap aıtty.

«Máselen, astyq qolhattary tıimdi qural retinde qalyp bara jatyr. ıAǵnı, agrarlyq qolhat negizinde jańa joldarǵa kóshken abzal. Astyqqa qatysty eseptiń bárin elektrondy formatqa aýystyrýdyń mańyzy zor. Ókinishke qaraı, kezinde bizdiń elevatorlar bos qoltańbany kóptep bere bergen. Bizge jańadan aýyl sharýashylyǵy salasynyń salyq túsimin qaıta qaraý kerek. Aýyl sharýashylyǵynan ózińiz biletindeı, salyq az túsedi. Salyq túsimi júıesiniń ózi de kúrdeli. Osy sebepti, biz bıznes pen ekonomıkalyq vedomstvomen birlesip, biryńǵaı agrarlyq salyq júıesin engizýge tyrysamyz», - dedi Ómirzaq Shókeev.

Mınıstr kótergen máseleni sóz sońynda shegeleı tústi.

«Jalpy, qarajat aǵymyn kóbeıtý úshin memlekettik baǵdarlamaǵa ózgeris engizý kerek. Sektor qarjynyń jetispeýshiliginen tunshyǵyp jatyr dese de bolady», - dep túıdi Ómirzaq Shókeev.