Aýyl sharýashylyǵy salasyn sýbsıdııalaýdyń jańa tásilderi engiziledi
«Aýyl sharýashylyǵy mınıstrligi Memleket basshysynyń Qazaqstan halqyna Joldaýynda vedomstvonyń aldyna qoıǵan mindetterin muqııat qarap, olardy iske asyrý boıynsha naqty sharalar ázirledi. Máselen, óndiris kólemin ulǵaıtý jáne otandyq aýyl sharýashylyǵy óniminiń qosylǵan qunyn arttyrý problemasyn sheshý úshin memlekettik yntalandyrý jáne qoldaý sharalary túzetilýde. Atap aıtqanda, sýbsıdııalaý qaǵıdalaryna aýyl sharýashylyǵy taýaryn óndirýshilerdiń óndiris kólemin turaqty ulǵaıtý jáne óńdeýshi kásiporyndarǵa shıkizat jetkizý boıynsha qarsy mindettemeler alýy jóninde mindetti norma engiziledi. Tereń óńdelgen ónimder shyǵaratyn óńdeshi kásiporyndardy memlekettik qoldaý aýqymyn keńeıtý kózdelip otyr», - dedi Erbol Qarashókeev.
Mınıstrdiń aıtýynsha, salany sýbsıdııalaýdyń jańa uzaq merzimdi tásildemelerin daıyndaý máselesinde jańa qaǵıdalar ázirleý aıaqtalýǵa jaqyn. Qazirgi ýaqytta ony arnaıy qurylǵan jumys toby aıasynda talqylaý júrip jatyr. Kelesi jyldan bastap atalǵan qaǵıdalar boıynsha jumys isteý úshin olardy osy jyldyń sońyna deıin bekitiledi.
«Jańa sýbsıdııalaý qaǵıdalarynyń negizgi tustary qarsy mindettemelerdiń oryndalýyn baqylaýdyń jáne olardy baǵalaýdyń pármendi quraldaryn engizý tetikteri arqyly bólingen sýbsıdııalardyń tıimdiligi men nátıjeliligin arttyrý, sybaılas jemqorlyq táýekelderin barynsha boldyrmaý jáne tsıfrlandyrý esebinen sýbsıdııalar alý rásimin ońaılatý bolyp sanalady. Salany tehnıkalyq jáne tehnologııalyq qaıta jaraqtandyrý mindetine keler bolsaq aýyl sharýashylyǵyna ınvestıtsııalar aǵynyn memlekettik yntalandyrý, óndiriske ǵylymı jáne ǵylymı-tehnıkalyq qyzmet, ǵylymı-zertteý jáne tájirıbelik-konstrýktorlyq jumystar nátıjelerin engizý sharalaryn odan ári kúsheıtý kózdelgen», - dedi ol.
