Aýyl sharýashylyǵy ónimderin jetkizýshiler qalalarǵa qalaı kiredi
NUR-SULTAN. QazAqparat –Kóktemgi dala jumystaryn bastaǵan sharýalar barlyq janar-jaǵarmaı men tyńaıtqyshtarmen qamtamasyz etilýi tıis. Bul týraly Prezıdent Qasym-Jomart Toqaev aıtty, dep habarlaıdy QazAqparat tilshisi.
«Kóktemdegi aýyl sharýashylyǵynyń máselelerine basa nazar aýdarý kerek. Eldiń ońtústiginde qazirdiń ózinde egin egý jumystary júrgizilýde (30% aıaqtaldy). Basqa aımaqtarda kóktemgi dala jumystary bir aı ishinde bastalýy tıis. Fermerler aınalym qarajatymen, pestıtsıdter men tyńaıtqyshtarmen, sapaly tuqymdar men janar-jaǵarmaımen qamtylýy kerek. Kóktemgi dala jumystaryn qarjylandyrý kólemi 3 ese artyp, 170 mlrd teńgege jetti», - dedi Qasym-Jomart Toqaev Tótenshe jaǵdaı rejımin qamtamasyz etý jónindegi memlekettik komıssııanyń otyrysynda.
Sonymen qatar, Prezıdent tezirek sheshimderdi talap etetin problemalar da týyndaıtynyn eske saldy.
«Aýyl sharýashylyǵynyń azyq-túlik ónimderin jetkizýshilerdiń karantındik qalalarǵa úzdiksiz kirýin qamtamasyz etý kerek. Olarǵa jedel túrde «jasyl» aýmaqtar arqyly ótkizý qujaty berilýi tıis. Bul kóktemgi dala jumystaryn bastaıtyn fermerlerge de qatysty másele», - dedi ol.
