Aýyl sharýashylyǵy óndirisiniń iri uıymdastyrýshysy Konstantın Hvan dúnıeden ozdy - Qyzylorda oblysy
QYZYLORDA. 4 qańtar. QazAqparat /Jańagúl Serdaly/ - Elimizge esimi belgili aýyl sharýashylyǵy óndirisiniń iri uıymdastyrýshysy, Qyzylorda oblysy Shıeli kentiniń turǵyny Konstantın Vasılevıch Hvan uzaqqa sozylǵan naýqastan keıin dúnıeden ozdy.
1936 jyly Prımore ólkesinde týǵan onyń balalyq shaqtan bastap qazirge deıingi búkil ómiri Syr boıynda ótti. Eńbek jolyn Qyzylorda oblysy Shıeli aýdanynda agronom bolyp bastaǵan ol budan keıingi jyldary keńshar dırektory, aýdandyq aýyl sharýashylyǵy basqarmasynyń bastyǵy, aýdandyq partııa komıtetiniń ekinshi hatshysy, aýdandyq keńes atqarý komıtetiniń tóraǵasy sekildi joldardan ótti.
Al elimiz táýelsizdikke qol jetkizgen jyldardan bastap aýyl sharýashylyǵy óndirisin qaıta kóterýge kómektesý maqsatynda ózi bir kezderi eńbek jolyn bastaǵan Shıeli aýdanyndaǵy «Avangard» keńsharyn basqaryp, ony qysqa merzim ishinde aıaǵynan tik turǵyzdy. Osylaısha bir kezderi 30-dan astam Sotsıalıstik Eńbek Eri shyqqan aýyldyń dańqyn qaıta asyrdy. Osy tusta «Avangard-Shıeli» dep atalǵan agrokeshen oblystaǵy eń aldyńǵy qatarly sharýashylyqtardyń birine aınaldy. Keıin isker basshy, sheber uıymdastyrýshy Konstantın Vasılevıchke kórshiles «Bıdaıkól» aýlynyń turǵyndary da ótinish jasap, sharýashylyqtaryn basqaryp berýdi surady. Ol osylaısha bir mezgilde eki birdeı sharýashylyqty qatar basqarǵan alǵashqy basshy boldy.
Otan aldyndaǵy erekshe eńbekteri úshin K.Hvan Eńbek Qyzyl Tý, «Halyqtar dostyǵy», egemendik jyldary «Qurmet» ordenderimen marapattalǵan.
