Aýyl sharýashylyǵy mınıstrliginiń ókilderi balyq qoryn saqtap qalý máselesin pysyqtady
ASTANA. Naýryzdyń 3i-i. QazAqparat /Aıdar Ospanalıev/ - Búgin Aýyl sharýashylyǵy mınıstrliginiń ókilderi balyq qoryn qorǵaýǵa baǵyttalǵan «Bekire-2010», «Ýyldyryq shashý-2010» keń aýqymdy aktsııalaryn uıymdastyrýǵa baılanysty arnaıy májilis ótkizdi, dep habarlaıdy QazAqparat.
Onda mınıstrlik ókilderi atalǵan aktsııalardyń uıymdastyrylýyna daıyndyqqa baılanysty atqarylyp jatqan ister men qalyptasqan máseleler tóńireginde sóz qozǵady. Aýyl sharýashylyǵy mınıstrliginiń Balyq sharýashylyǵy komıtetiniń basqarma bastyǵy Baýyrjan Jumajanovtyń aıtýynsha, balyqty zańsyz aýlaý áreketteriniń balyqtyń ýyldyryq shashatyn kezinde kóbeıe túsetini belgili. Al bekiretuqymdas balyqtardyń ýyldyryǵy óte qymbat baǵalanady. Sondyqtan búgin bul máselege barynsha jiti kóńil bólingen jón. «Bul rette elde memlekettik organdardyń ókilderinen turatyn birlesken top qurý qajet jáne olardyń respýblıkanyń iri basseıinderine shyǵý kestelerin bekitken jón. Buǵan jyldaǵy qoldanylatyn tájirıbe retinde qaramaı, ony barynsha jetildirip, ári barynsha uıymdasqan túrde ótkizý qajet», dedi basqarma bastyǵy.
Onyń sózine qaraǵanda, qazir elimizdiń Jaıyq-Kaspıı, Aral-Syrdarııa, Zaısan-Ertis, Balqash-Alakól oblysaralyq basseındik balyq sharýashylyǵy ınspektsııalarynyń janynan baǵaly balyqtardy zańsyz aýlaýmen kúreske baǵyttalǵan arnaıy shtab qurylǵan. Aktsııaǵa elimizden 600-den astam memlekettik balyq ınspektorlary men 90-ǵa jýyq júzý jáne kólik quraldary qatysady dep kútilýde.
