Aýyl sharýashylyǵy mınıstrliginde etti mal sharýashylyǵyna jańa tehnologııalar engizýge arnalǵan semınar ótti
«QazAgro» Ulttyq basqarý holdınginiń uıymdastyrýymen ótken sharaǵa vedomstvo basshylary, kanadalyq kompanııa sarapshylary, Aqmola men Qaraǵandy oblystarynyń aýyl sharýashylyq kásiporyndary men fermer sharýashylyqtarynyń basshylary qatysty.
Esterińizge sala keteıik, aǵymdaǵy jylǵy Joldaýynda Elbasy N. Nazarbaev 2016 jylǵa deıin elimizdegi eksporttyq baǵyttaǵy et áleýetin 60 myń tonnaǵa deıin jetkizý mindetin júktegen bolatyn. Atalǵan mindetti oryndaý maqsatynda «Qazaqstan Respýblıkasynda iri qara mal etiniń eksporttyq áleýetin damytý» jobasy ázirlengen edi. Osyǵan oraı, mal sharýashylyǵy boıynsha udaıy óndiristi basqarý jáne konsaltıngtik ortalyq qurylǵan bolatyn. Al bul ortalyqtyń negizgi qyzmeti asyl tuqymdy maldy damytý, agroónerkásip kesheni sýbektilerine konsaltıngtik qyzmetter kórsetý bolyp tabylady. Bul rette halyqaralyq sarapshylardy tarta otyryp, ortalyq qyzmetkerleri jańa zamanaýı tehnologııalardy endirý máselelerimen de aınalysyp keledi. Búgingi tájirıbelik semınardyń maqsaty da osy. Shara barysynda onlaın-rejımda konsýltatsııalar jasalyp, qajetti aqparattyq materıaldar shyǵarylady.
Buǵan deıin osy mazmundas semınarlar Shyǵys Qazaqstan, Pavlodar, Batys Qazaqstan jáne Aqtóbe oblystarynda ótkizilgen bolatyn. Jyl sońyna deıin el óńirlerinde bundaı 20-ǵa tarta shara ótkizý josparlanǵan.
