Aýyl sharýashylyǵy mınıstrligi jumyrtqa óndirisin sýbsıdııalaýdy jalǵastyrady

NUR-SULTAN. QazAqparat - Daǵdarys jaǵdaıyna baılanysty jumyrtqa óndirýshilerdi qoldaý týraly sheshim qabyldandy, dep habarlaıdy Aýyl sharýashylyǵy mınıstrliginiń baspasóz qyzmeti

«Agroónerkásiptik keshendi damytý» memlekettik baǵdarlamasynda 2020 jyldan bastap jumyrtqaǵa taýarlyq sýbsıdııany alyp tastaý qarastyrylǵan. Sýbsıdııany alyp tastaý týraly norma 2017 jyly memlekettik baǵdarlama qabyldanǵan sátte qus fabrıkalary basshylary men qus óndirýshilerdiń salalyq qaýymdastyǵymen kelisilgen bolatyn.

Alaıda, COVID 19 vırýsynyń taralýynan týyndaǵan daǵdarysqa baılanysty 2020 jyly jumyrtqanyń ózindik quny kúrt ósti. Osyǵan baılanysty QR Aýyl sharýashylyǵy mınıstrligi jumyrtqa óndirýshilerdi qoldaýdy jáne ónimniń birligine sýbsıdııalaý normasyn 3 ten 1,5 teńgege deıin tómendete otyryp, «azyq-túlik jumyrtqasyn óndirýdi sýbsıdııalaý» baǵytyn saqtaýdy usyndy.

«Qus ósirýshilerdi qoldaý jáne sáıkesinshe jumyrtqanyń ózindik qunyn tómendetýge QR Úkimeti 5 mlrd teńge bólýdi josparlap otyr» delingen habarlamada.

Sonymen qatar, Úkimet jumyrtqa óndirýshilerge «Qarapaıym zattar ekonomıkasy» baǵdarlamasy arqyly aınalym qarajatyn tolyqtyrý úshin jeńildetilgen qarjy alý múmkindigin berdi. Bul qus fabrıkalary qıyn kezeńde ózin jemmen qamtamasyz ete alýy úshin jasaldy.

Sonymen qatar, aýyl sharýashylyǵy taýar óndirýshilerine asyl tuqymdy qus satyp alýǵa sýbsıdııa túrinde jáne eksporttyq ónimdi tasymaldaý shyǵyndaryna qosymsha qoldaý kórsetiledi.

Esterińizge salsaq, Qazaqstanda jumyrtqa óndiretinin 31 qus fabrıkasy bar. Boljam boıynsha olar jylyna 5,5 mlrd jumyrtqa óndiredi.

Sonymen birge, otandyq óndiris qazaqstandyq naryqtyń 100%-dan astam qajettiligin qamtamasyz etedi. Demek, qus fabrıkalarynyń artyq ónimdi shetelge satý múmkindigi bar.

2019 jyly respýblıkanyń qus fabrıkalary 527 mln dana jumyrtqany eksporttady. 2020 jylǵy qańtar-aqpan aılarynda eksport kólemi - 1542 tonna (30,8 mln dana).