Aýyl sharýashylyǵy mınıstrligi stýdentterge bilim grantyn bóletin bolady
Bul ózgerister 2019 jylǵy 28 qazanda Memleket basshysy qol qoıǵan «Qazaqstan Respýblıkasynyń keıbir zańnamalyq aktilerine agroónerkásiptik keshendi memlekettik retteý máseleleri boıynsha ózgerister men tolyqtyrý engizý týraly» zańyna sáıkes júzege asyrylady.
«Qabyldanǵan zań aıasynda QR Bilim jáne ǵylym mınıstrliginiń joǵary jáne orta arnaýly oqý oryndaryndaǵy aýyl sharýashylyǵy mamandyqtary boıynsha mamandar daıarlaýǵa arnalǵan memlekettik bilim berý tapsyrysynyń kólemin anyqtaý, ony bólý men ornalastyrý baǵytyndaǵy quzyreti QR Aýyl sharýashylyǵy mınıstrligine beriledi. Qabyldanǵan bul ózgeris saladaǵy mamandy daıyndaýda memlekettik tapsyrysty naqty qalyptastyrýǵa, qarjylandyrý kólemin durys anyqtaýǵa, sapaly kadrdy daıarlaıtyn joǵary oqý oryndaryn ádiletti túrde irikteýge jáne mamandyq boıynsha granty durys bólýge múmkindik beredi dep kútilýde», delingen habarlamada. Joǵaryda atalǵan zańnyń bilim berý granttaryna qatysty ózgerister men túzetýler engizilgen normalary 2020 jylǵy 6 qańtardan bastap óz kúshine enedi. Esterińizge sala ketsek, «Qazaqstan Respýblıkasynyń keıbir zańnamalyq aktilerine agroónerkásiptik keshendi memlekettik retteý máseleleri boıynsha ózgerister men tolyqtyrý engizý týraly» zańy elimizdegi agroónerkásiptik keshen salasyndaǵy zańnamany jetildirý maqsatynda qabyldanǵan. Onda Qazaqstan Respýblıkasynyń 13 kodeksi men 29 zańyna 800-den asa túzetý engizý qarastyrylǵan.
