Aýyl sharýashylyǵy mınıstrligi Statıstıka agenttiginiń mal sharýashylyǵyna qatysty derekterine kúmán keltirýde

ASTANA. 19 maýsym. QazAqparat - QR Aýyl sharýashylyǵy mınıstrligi QR Statıstıka agenttiginiń eldegi mal sharýashylyǵy salasyndaǵy ahýal týraly taratqan derekterine kúmánmen qaraıdy.

«QR Statıstıka agenttiginiń mal sharýashylyǵy týraly taratqan derekteri kúmán týǵyzatynyn atap ótýimiz qajet», - dedi búgin Aýyl sharýashylyǵy mınıstrliginiń alqa otyrysynda vedomstvo basshysynyń orynbasary Gúlmıra Isaeva.

Máselen, Statagenttiktiń málimetteri boıynsha, sút óndirisi jylyna 4,8 mln. tonna bolady. Alaıda, AShM esepteýleri boıynsha kúndelikti tutyný men 1 mln. tonna kólemindegi ımportty qosa eseptegende sút óndirý shamamen 3,5 mln. tonnany quraıdy.
«Bizdiń pikirimizshe, málimetterdiń durys bolmaýy jeke úı sharýashylyqtarynda maldyń kóptiginen, esep júrgizýdiń, qosyp jazýdy anyqtaýdyń qıyndyǵynan bolyp otyr. Osyǵan baılanysty biz qazir Statagenttikpen birlese otyryp, sanaq júrgizýdiń ádistemelerin jetildirip jatyrmyz», - dedi G.Isaeva.