Aýyl sharýashylyǵy mınıstrligi shegirtke qaýpi týraly pikirlerge jaýap berdi
Respýblıkalyq bıýdjetten zııankestermen kúresýge pestıtsıdterdi satyp alý, olardy saqtaý, tasymaldaý jáne qoldaný jónindegi qyzmetterdi satyp alýǵa 3,8 mlrd teńge bólingen.
«Áleýmettik jeliler men túrli toptarda Qazaqstannyń belgili bir oblysy aýmaǵynda shegirtkeniń taralǵany týraly foto jáne beıne materıaldar paıda boldy. Alaıda, bul aqparattar kóbinese jalǵan bolyp shyǵady, óıtkeni jarııalanǵan beınejazbalarda basqa elderde túsirilgen kadrlar jıi qoldanylady. Jalpy, respýblıka boıynsha ıtalııalyq prýsqa qarsy óńdeý jumystary 1,1 mln ga jerde nemese belgilengen aýmaqtyń 85%-ynda aıaqtaldy. Óńdeý jumystary Atyraý, Shyǵys Qazaqstan, Jambyl, Jetisý, Qaraǵandy, Qyzylorda jáne Pavlodar oblystarynda tolyǵymen atqaryldy», - dep habarlady mınıstrliktiń baspasóz qyzmeti.
Bir kún buryn Abaı oblysynda zııankesterdiń azdaǵan taralýy tirkelip, onda qorǵanys sharalary ýaqtyly qolǵa alynyp, qaýip seıilgen.
«Atap aıtqanda, Shaǵan aýylynda 120 gektar jaıylym óńdeldi, daqyl alqaptary zardap shekken joq. Bul rette shegirtke zııankesterine qarsy hımııalyq óńdeý ósimdik óniminiń joǵalýyna ákelýi múmkin bolǵan jaǵdaıda ǵana júrgiziletinin atap ótken jón. Jalpy, barlyq óńirlerde jergilikti jerlerde jumysty úılestirý úshin jedel shtabtar quryldy, monıtorıng jáne qorǵaý is-sharalary boıynsha jumystardy uıymdastyrý josparlary bekitildi», - deıdi mınıstrlik.
Respýblıka boıynsha hımııalyq óńdeýlerdi júrgizý kezinde 212 dana arnaıy tehnıka, onyń ishinde 130 jerústi jeldetkish búrikkish, 35 aerozoldi gaz generatory, 26 jeńil avıatsııa kemesi jáne 21 ushaq jumyldyryldy.
Sonymen qatar, shekara mańyndaǵy shegirtke jaǵdaıy únemi qadaǵalanyp otyrady. Ózara yntymaqtastyq týraly kelisimderge sáıkes, Reseı Federatsııasy, Qytaı Halyq Respýblıkasy, Ózbekstan jáne Qyrǵyz Respýblıkasynyń Aýyl sharýashylyǵy mınıstrlikterimen fıtosanıtarlyq jaǵdaı týraly aqparat almasý jolǵa qoıylǵan.