Aýyl sharýashylyǵy mınıstrligi sharýalardy saqtandyrýdyń júıesin ózgertti
Qujatta aýyl sharýashylyq salasy ókilderin qoldaý maqsatynda birneshe naqtyly sharalar qarastyrylyp, sharýalar úshin mindetti saqtandyrýdan erikti saqtandyrýǵa kóshý júıesi engizilip otyr.
Mınıstrliktiń baspasóz qyzmeti habarlaǵandaı, elimizdegi mindetti saqtandyrý júıesi osydan 15 jyl buryn «Ósimdik sharýashylyǵyndaǵy mindetti saqtandyrý týraly» zańymen engizilgen bolatyn. Atalmysh zań aýyl sharýalaryna egis alqaptaryn saqtaýǵa jáne joıylǵan jaǵdaılarda shyǵyndardy óteýge baǵyttalǵan bolatyn. Alaıda, bul júıe aýyl sharýalaryn saqtandyrý jaǵdaılarynyń eń tómengi óndiristik shyǵyndaryn óteı almaı, is-júzinde ózine júktelgen mindetterdi tolyq oryndaı almady.
Aýyl sharýashylyǵy mınıstrligi sharýalardan kelip túsken ótinishterdi eskere kele, aýyl sharýashylyǵyndaǵy saqtandyrý júıesin ózgertýdiń jańa tetikterin ázirledi.
Bul ózgerister 2019 jylǵy 28 qazanda Memleket basshysy qol qoıǵan «Qazaqstan Respýblıkasynyń keıbir zańnamalyq aktilerine agroónerkásiptik keshendi memlekettik retteý máseleleri boıynsha ózgerister men tolyqtyrý engizý týraly» zańyna sáıkes júzege asyrylady.
Nátıjesinde, 2020 jylǵy qańtar aıynan bastap «Ósimdik sharýashylyǵyndaǵy mindetti saqtandyrý týraly» Zańy óz kúshin joıady jáne ósimdik jáne mal sharýashylyǵy salalarynda mindetti saqtandyrýdan erikti saqtandyrýǵa kóshý júzege asyrylady.
Qabyldanǵan saqtandyrýdyń jańa júıesi aýyl sharýashylyǵy sýbektilerin qoldaýdyń naqtyly baǵyttaryn aıqyndap otyr. Atap aıtqanda, mınıstrlik endi saqtandyrýdy sýbsıdııalaýdyń ornyna saqtandyrý polısterin alýdy sýbsıdııalaý júıesin engizdi. Bul fermerlerlerdiń shyǵyndaryn azaıtyp, saqtandyrý júıesi men saqtandyrý qarjylaryn alý júıesin ashyq etedi.
Sondaı-aq, mınıstrlik fermerlerge ekinshi deńgeıli bankterden nesıeler alý barysynda saqtandyrý polısterin kepildik retinde paıdalanýǵa múmkindik beretin normalardy qarastyryp otyr.
Aıta ketý kerek, erikti saqtandyrýdyń jańa júıesi elektrondyq platformada jumys isteıtin bolady. Saqtandyrý kelisim-sharttaryn jasaý, sýbsıdııalaý, saqtandyrý jaǵdaıynyń oryn alýy faktilerin anyqtaý jáne saqtandyrý tólemderin tóleý aqparattyq júıe arqyly júrgiziletin bolady. Bul táýekelderdi basqarýdyń ashyq júıesin qurýǵa múmkindik beredi.