Aýyl sharýashylyǵy mınıstrligi mindetti mal soıý alańdarynyń engizilýine qatysty Qostanaı oblysynda et baǵasynyń óskendigi týraly aqpartty joqqa shyǵarady
ASTANA. Aqpannyń 24-i. QazAqparat /Qanat Mámetqazyuly/ - Aýyl sharýashylyǵy mınıstrligi Qostanaı oblysyndaǵy et baǵasynyń kenetten ósýi týraly aqparat negizsiz dep sanaıdy.
Sonymen birge, mindetti mal soıý alańdarynyń engizilýine qatysty et baǵasynyń ósýi týraly aqparatty joqqa shyǵarady. Bul týraly búgin atalǵan másele boıynsha jýrnalısterge arnap baspasóz máslıhatyn ótkizgen Aýyl sharýashylyǵy mınıstrliginiń Jaýapty hatshysy Evgenıı Aman málim etti , dep habarlaıdy QazAqparat.
«Qostanaı oblysyndaǵy et baǵasyna qatysty máseleniń bulaı bolýy orynsyz dep sanaımyn. Eger mal soıý pýnktteri men alańdaryna keletin bolsaq, bul másele 2006 jyly «Veterınarııa týraly» zań jobasynda qamtylǵan bolatyn, sodan keıin byltyr zańǵa túzetýler engizildi. Soǵan sáıkes, maldy soıýǵa qatysty birqatar normalar qataıtyldy. Árıne, biz elimizde veterınarlyq talaptardyń áli de jaqsara túsýi qajettigin túsinemiz. Sondyqtan da, búgingi kúni Úkimet tarapynan veterınarlyq tártipti qadaǵalýdyń keń aýqymdaǵy sharalary júrgizilip jatyr. Al osy talaptarǵa sáıkes, maldy soıýdy mindetti túrde arnaıy mal soıý pýnktterinde nemese tıisti et kombınattarynda júzege asyrý qarastyrylǵan. Bul talapty Aýyl sharýashylyǵy nemese qandaı da bir sheneýnik oıdan shyǵara salǵan joq, bul veterınarııanyń naǵyz talabynyń biri bolyp tabylady ári bul halyq densaýlyǵyn saqtaýǵa qatysty júrgiziletin shara. Bul rette men eń aldymen BAQ ókilderin máseleniń mánisine qanyq bolýyna shaqyrar edim. Óıtkeni, bul jerde Aýyl sharýashylyǵy mınıstrligi veterınarııa salasynda tártip ornatýdy qolǵa alyp otyr. Ekinshiden, baǵany qalyptastyrý jáne tabys bóligine taýar óndirýshi eshqandaı zıyn shegip otyrǵan joq, satyp alýshy-deldaldar baǵaǵa áser etip otyr. Osylaısha, baǵany jasandylyqpen qoldan kótergen alypsatarlar bárin mal soıý alańdarymen baılanystyrǵysy keledi. Bul durys emes», dedi E. Aman.
Jaýapty hatshynyń aıtýynsha, búgingi kúni Soltústik Qazaqstan oblysynda saparda júrgen Aýyl sharýashylyǵy mınıstri de máselemen tolyq tanysyp, ondaǵy jaǵdaıǵa ábden qanyǵyp otyr. Qazirgi aqparatqa qaraǵanda, soıys ónimderin tasymaldaý boıynsha tasymaldaý shyǵyndary da, veterınarııalyq-sanıtarııalyq saraptama júrgizý quny da ózgerissiz qalǵan. Sonymen birge, iri qarany soıý mal basyna - 550 teńgeni, shoshqa etine - 350 teńgeni quraıdy. «Buny soıylǵan maldyń salmaǵyna shaqsaq, 5 teńgeniń aınalysynda keledi. Sondyqtan da, mal soıý alańdarynyń jumysynan et baǵasy artyp otyr degen bos sóz. Biz bul saıasattan bas tartpaımyz jáne ony satylap júrgizemiz. Sondyqtan da, qandaı da bir bazarda, qandaı da bir oryndarda et baǵasy qymbattasa ondaǵy baǵany qalyptastyrýǵa áser etip otyrǵannyń barlyǵyn tekserý kerek. Sol úshin Qostanaı oblysynda mal soıý alańdarynyń engizilýine baılanysty et baǵasy qymbattady degen aqparatty joqqa shyǵaramyz», dedi E. Aman.
Toqtala ketetin jaıt, QR Aýyl sharýashylyǵy mınıstrliginiń málimetinshe, aǵymdaǵy jylǵy aqpannyń 11-inde Qostanaı oblysynda 37 mal soıý pýnkti jáne 60 mal soıý alańdaryn salý uıymdastyrylǵan.
