Aýyl sharýashylyǵy mınıstrligi kúz mezgiliniń sońy men kóktemniń sońyna deıin bolatyn azyq-túlik zárýliginiń aldyn alýǵa kúsh salýda
ASTANA. Naýryzdyń 17-si. QazAqparat /Aıdar Ospanalıev/ - Elimizde azyq-túlik qaýipsizdigin qamtamasyz etý máselesi boıynsha Memleket basshysy júktegen mindetterdi júzege asyrýdaǵy problemalardyń biri erte pisetin kókónistermen baılanysty bolyp otyr.
Bul týraly búgin Astanada «Qazaqstannyń qorǵalǵan topyraǵy - 2010» atty taqyrypta ótken II semınar-keńes barysynda aýyl sharýashylyǵy vıtse-mınıstri Arman Evnıev málim etti, dep habarlaıdy QazAqparat.
Onyń aıtýynsha, eldegi jemis-jıdek pen kókónis ónimderi turǵyndardyń suranysynan 1,6 paıyzǵa kóp. Alaıda osy máselege baılanysty aı saıynǵy jaǵdaıdy jiti zertteı kelgende qazan-qarasha aılarynan bastap, sáýir men mamyr aılaryna deıingi aralyqta kókónis pen jemis-jıdekke zárýlik paıda bolatyndyǵy baıqaldy. «Bunyń birneshe sebebi bar. Ol kókónisterdi saqtaıtyn jáne tasymaldaıtyn arnaıy júıe joq. Onyń ústine atalmysh ónimderdi ótkizýdiń de biryńǵaı júıesi jasalmaǵan. Osyǵan qaraı biz atalmysh salany damytýdy eki túrli jolmen júzege asyryp kelemiz. Birinshiden biz jemis-jıdek pen kókónis ónimderin óndirý kólemin arttyrýǵa kúsh salyp otyrmyz. Ol úshin óndirilgen ónimdi saqtaıtyn qoımalar men ony tasymaldap, saýdaǵa salý júıesin oılastyrýdamyz. Al máseleniń ekinshi baǵyty qorǵalatyn topyraqtaǵy kókónis pen jemis-jıdekterdi óndirýge qatysty bolyp otyr», dedi vıtse-mınıstr.
Semınar barysynda jıynǵa qatysýshylar qorǵalǵan topyraqtaǵy kókónis pen jemis-jıdekti óndirý jáne jylyjaılardy damytýǵa qatysty máselelerdi ortaǵa salyp, olar boıynsha pikir almasyp, máseleniń sheshilý joldaryn qarastyrdy.
