Aýyl sharýashylyǵy mınıstrligi kenemen kúresti durys jolǵa qoıa almaı otyr - G. Seıitmaǵanbetova
ASTANA. Mamyrdyń 19-y. QazAqparat /Qanat Mámetqazyuly/ - Aýyl sharýashylyǵy mınıstrligi adamǵa qaýipti aýrý juqtyratyn kenemen kúresti durys jolǵa qoıa almaı otyr.
Búgin Parlament Májilisiniń jalpy otyrysynda Úkimet basshysynyń atyna saýal joldaǵan depýtat Gúlnár Seıitmaǵanbetova osylaı málim etti, dep habarlaıdy QazAqparat.
Sóz arasynda depýtat elimizdiń ońtústik óńirlerinde sońǵy jyldary kongo-qyrym qandy bezgegine shaldyǵýlar oryn alǵanyn, odan adam shyǵyny artqanyn atap ótti. Onyń sózine qaraǵanda, osyndaı aýrýdyń tabıǵı oshaǵy bar Ońtústik Qazaqstan, Jambyl, Qyzylorda oblystarynda ótken jyly aýrýdy juqtyrǵan 26 adam tirkelse, bıylǵy jyldyń naýryz aıynan beri tek Ońtústik Qazaqstan oblysy boıynsha ǵana 8 adam tirkelip, onyń 2-eýi qaıtys bolǵan.
«Jalpy, elimizde veterınarlyq qyzmet kórsetý salasynda birqatar qordalanyp qalǵan problemalar bar ekeni anyqtalýda. Bunyń eń bastysy joǵaryda atalǵan aýrýlardy juqtyratyn jáne ony adamdarǵa taratatyn kenelerge qarsy kúres durys jolǵa qoıylmaı otyr. Kenelerden tazartý, óńdeý jumystary Aýyl sharýashylyǵy mınıstrligi tarapynan eshqandaı baqylaýsyz qalýda. Ony búgingi tańda árbir oblys óz deńgeıinde júrgizip, shamasyna qaraı qarjylandyrady. Al ortalyqtan - Aýyl sharýashylyǵy mınıstrliginen baǵyttalǵan turaqty baqylaý áli ornamaı keledi, eshqandaı da keshendi aldyn alý sharalary atqarylyp otyrǵan joq», dedi G. Seıitmaǵanbetova.
Buǵan dálel retinde depýtat Ońtústik Qazaqstan oblysynda sońǵy 7 jyl boıy mal ósiretin, mal ónimin daıyndaıtyn jaılardyń profılaktıkalyq sharalardan ótpegenin alǵa tartty. Depýtattyń aıtynsha, tıisti jumystardy júrgizbeý mal ónimderiniń qaýipsizdigine, halyq densaýlyǵyna aýyr zalal keltiredi.
«Sondyqtan da, qaýipti vırýstyq ınfektsııanyń aldyn alý úshin júrgiziletin veterınarlyq sharalarǵa tek memlekettik deńgeıde, turaqty túrde tıisti qarajat bólinýi qajet», dedi G. Seıitmaǵanbetova.
