Aýyl sharýashylyǵy mınıstrligi elimizdegi sý qoımalaryndaǵy balyq resýrstaryn aýlaýǵa shekteý qoımaq

Bul týraly búgin osy máselege baılanysty jýrnalıstermen bolǵan baspasóz máslıhatynda Aýyl sharýashylyǵy mınıstrliginiń balyq sharýashylyǵy komıteti tóraǵasynyń mindetin atqarýshy   Baýyrjan Jumajanov málim etti.

 Onyń aıtýynsha, qazirgi tańda elde balyq resýrstary men ózge de sý jándikterin aýlaýǵa tyıym salatyn arnaıy qaýly shyqqan. Atalmysh qaýlynyń talaptaryna sáıkes, kóktemde, ıaǵnı balyqtardyń ýyldyryq shashatyn mezgilinde osy ýyldyryq shashýǵa qolaıly jerlerde balyq aýlýǵa tyıym salynady. Bir sózben aıtqanda, qaýlynyń basty maqsaty elimizdegi azaıyp bara jatqan balyq túrlerin saqtap qalý bolyp tabylady.

 «Bul rette biz, ásirese Atyraý óńirinde Kaspıı teńizi men Jaıyq ózeninde bekire tuqymdas balyqtardyń kóbeıýine jaǵdaı jasaýdy basty maqsat etip otyrmyz. Bekire tuqymdas balyqtardy aýlaýǵa moratorıı jarııalaý jóninde Memleket basshysynyń tapsyrmasy bar ekendiginen de qalyń kópshilik habardar bolar. Bizdiń qolǵa alyp otyrǵan shekteýler osyndaı mindetterden de týyndap otyr dep aıtýǵa bolady»,-dedi B.Jumajanov.

 Buǵan qosa Balqash-Alakól basseıninde balyqtardyń azaıyp bara jatqandyǵy baıqalyp otyr. «Bul týraly qazir ǵalymdar da  dabyl qaǵýda. Osy sebepti qazir respýblıkanyń keıbir aımaqtarynda balyq aýlaýǵa shekteý qoıý merzimi ádettegiden uzaq bolady»,-dedi mınıstrlik ókili.