Aýyl sharýashylyǵy mınıstrligi eldegi ormandy alqaptardy órtten qorǵaý maqsatynda alǵash ret ádetten tys sharalardy qolǵa aldy
ASTANA. Mamyrdyń 5-i. QazAqparat /Aıdar Ospanalıev/ - Aýyl sharýashylyǵy mınıstrligi eldegi ormandy alqaptardy órtten qorǵaý maqsatynda alǵash ret ádetten tys sharalardy qolǵa alyp otyr.
Osylaısha endi elimizdiń ormandy alqaptary túngi mezgilde de kúzetiletin bolady. Bul týraly búgin jýrnalıstermen bolǵan baspasóz máslıhatynda Aýyl sharýashylyǵy mınıstrliginiń Orman jáne ańshylyq sharýashylyǵy komıtetiniń tóraǵasy Erlan Nysanbaev málim etti, dep habarlaıdy QazAqparat.
Onyń sózine qaraǵanda, eń qaýipti degen aımaqtarǵa erekshe nazar aýdarylyp, ol jerlerge elimizdiń ózge aımaqtarynan ormandy qorǵaý sharalaryn júzege asyrý úshin mamandar issaparlarǵa jiberilýde. «Bıylǵy jyly órt qaýpi tónip turǵan aımaqtarda jergilikti atqarýshy organdarmen, aýyl sharýashylyǵy ónimderin óndirýshilermen úlken jumystar atqaryldy. Degenmen qaýiptiń aýyly alys deýge áli erte. Ókinishe oraı, qazir bizdiń aýyl sharýashylyǵy ónimin óndirýshilerdiń salaqtyǵy men jaýapsyzdyǵy Soltústik Qazaqstanda úlken órttiń oryn alýyna sebep boldy. Onda 748 gektar aımaqty jalyn sharpydy. Olardyń 470 gektary ormandy alqaptar. Tap osy sebeppen Aqmola oblysynda da órt oqıǵalary oryn alyp, onda 21 gektar aımaq janyp ketti. Al Qaraǵandy oblysynda tilsiz jaý 17 gektar jerdi kúıdirip jiberdi», dedi, komıtet tóraǵasy.
Onyń sózine qaraǵanda, qazir elimizdiń barlyq aımaqtaryna órtterdiń aldyn alý sharalaryna baılanysty tıisti telefonogrammalar jiberilgen. Sondaı-aq oblystyq-aımaqtyq ınspektsııalarǵa aýdandyq ákimdikter arqyly órtten saqtaný sharalaryna baılanysty tıisti kezdesýler ótkizý jóninde habarlandy.
