Aýyl sharýashylyǵy mınıstrligi búlingen qarbyzdardyń vıdeosyn zerttep shyqty
Osy oraıda Qazaqstannyń barlyq oblys ortalyqtaryndaǵy bazarlar karantındik qadaǵalaýǵa alynyp, qaýyn shybynynyń taralýyna jol bermeý sharalary iske asyrylýda.
«Maýsym aıynda tirkelgen bul oqıǵa boıynsha tekserý júrgizdik. Bul karantındik qaýyn shybynyna qatysty bolyp otyr. Kóbinese osy zııankes baqsha daqyldaryn búldiredi, sonymen qatar ol elimizdiń ońtústik óńirlerinde jáne Ortalyq Azııanyń barlyq elderinde taralǵan. Ózderińiz bilesizder, jyl saıyn memleket tarapynan atalǵan zııankespen kúreske tıisti qarjy bólinedi»,-dedi QR AShM Agroónerkisiptik keshendegi memlekettik ınspektsııa komıtetiniń tóraǵasy Erjan Aınabekov Úkimette ótken baspasóz máslıhatynda.
Onyń atap ótýinshe, atalǵan fakti boıynsha bul qaterdi joıý aıasynda karantındik sharalar iske asyryldy.
Esterińizge sala keteıik, QR AShM komıtetiniń aýmaqtyq ınspektsııasy Astana bazaryndaǵy shirip ketken qarbyzdar týraly atyshýly beınejazbaǵa qatysty pikir bildirgen bolatyn.