Aýyl sharýashylyǵy mınıstrligi aqtóbelik fermerlerdiń narazylyǵyna pikir bildirdi

NUR-SULTAN. QazAqparat - QR Aýyl sharýashylyǵy vıtse-mınıstri Rústem Qurmanov Aqtóbe oblysy aýyl sharýashylyǵy qyzmetkerleriniń mıtıngisine qatysty pikir bildirdi, dep habarlaıdy QazAqparat tilshisi.

Úkimet otyrysynan keıin BAQ ókilderiniń saýalyna jaýap bergen vıtse-mınıstr aqtóbelik fermeler aldyndaǵy sýbsıdııa boıynsha qaryzdyń qaıdan shyqqanyn túsindirip berdi.

«Másele eń aldymen josparlaýǵa baılanysty. Óıtkeni, qarajatty esepteýge adamdardyń sany negiz bolǵan edi. Aldaǵy úsh jyldyq bıýdjette esepteý júıesin ózgertemiz, óńirdiń óńirlik ishki ónimin alamyz jáne bul máseleni eskeremiz. Jospardan artyq óndirilýi - bul jyl saıynǵy tájirıbe. Óndiris te solaı, eselep asyp ketýi múmkin. Biraq, bıýdjet múmkindigi shekteýli. Sol sebepti qaryz ótpeli», - dedi ol.

Onyń atap ótýinshe, sýbsıdııaǵa ótinimdi tikeleı ákimdikter beredi. Al Aýyl sharýashylyǵy mınıstrligi ol ótinimderdi qaraıdy.

«Olar ónimdi shyǵaryp, qazirgi ýaqytta satty. Endi olar shyǵarylǵan ónimge ótemaqy alǵylary keledi. Bul shyǵystar kelesi jyldyń bıýdjetinen óteletin bolady. Eki aı ǵana ýaqyt qaldy, qańtarda biz aqsha alamyz. 2020 jyly qaryz boıynsha tóleıtin aıyrmany bıýdjetti naqtylaý barysynda eskeremiz», - dedi R.Qurmanov.

Vıtse-mınıstrdiń dereginshe, aqtóbelik fermeler aldyndaǵy qaryz - 4 mlrd teńge. Al jalpy elimiz boıynsha mundaı qaryz somasy 36,8 mlrd teńge.

Esterińizge sala ketsek, 4 qarasha Aqtóbe oblysynda fermerler mıtıngige shyqty. Olar Reseıdiń shekaralas óńirlerinen mal ákelýge salynǵan tyıymǵa narazylyq tanytyp otyr. Sonymen qatar ol «Yrys» jáne «Sybaǵa» memlekettik baǵdarlamasy boıynsha sýbsıdııa tóleýdiń keshigýine alańdaýshylyq tanytýda.