Aýyl sharýashylyǵy mınıstrligi agroónerkásip kesheni salasynda 21 ruqat berý qujatyn alyp tastaýdy kózdep otyr
TANA. 30 qarasha. QazAqparat /Qanat Mámetqazyuly/ - Aýyl sharýashylyǵy mınıstrligi ázirlep jatqan zań jobasy boıynsha aldaǵy ýaqytta agroónerkásip kesheni salasynda 21 ruqsat berý qujatyn alyp tastaý kózdeledi.
Búgin QR Parlamenti Senaty depýtattarymen kezdesýi barysynda Aýyl sharýashylyǵy mınıstri Asyljan Mamytbekov osylaı málim etti.
Atalǵan zań jobasy Ekonomıkalyq damý jáne saýda mınıstrligimen birlese ázirlenýde. Zań jobasy ruqsat berý qujattaryn qysqartý jáne memlekettik organdardyń baqylaý-qadaǵalaý fýnktsııalaryn ońtaılandyrýdy kózdeıdi. Osyǵan oraı, qoldanystaǵy 86 ruqsatnama qujattarynyń 21-i alynyp tastalyp, 5 ruqsat qujaty nusqamalyq tártipke kóshedi. Atap aıtqanda, ósimdikterdi qorǵaý men karantıni salasynda - 5 qujat, orman jáne ań sharýashylyǵynda - 10 qujat, balyq sharýashylyǵynda - 5 qujat, tuqym sharýashylyǵynda - 1 qujat, bıootyn óndirisi salasynda 2 ruqsatnamalyq qujat qoldanystan alynyp tastalady.
«Qazirgi ýaqytta Senattyń qaraýyna eki zań jobasy engizilip otyr. Onyń biri asyl tuqymdy mal sharýashylyǵy máselelerin qamtysa, ekinshisi orman sharýashylyǵy, janýarlar dúnıesi men erekshe qorǵalatyn tabıǵı aýmaqtarǵa qatysty bolyp tabylady», - deıdi A. Mamytbekov.
