Aýyl sharýashylyǵy mınıstriniń tóraǵalyǵymen oblys ákimderi orynbasarlarynyń, aýyldyq aýmaqtardy damytý bólimderiniń alqa májilisi ótti
ASTANA. Qazannyń 23-i. QazAqparat - Keshe Aýyl sharýashylyǵy mınıstrliginde Aýyl sharýashylyǵy mınıstri Aqylbek Kúrishbaevtyń tóraǵalyǵymen aýyl sharýashylyǵy máselelerin basqaratyn oblys ákimderi orynbasarlarynyń, oblystardyń aýyldyq aýmaqtardy damytý bólimderiniń, qurylymdyq bólimshelerdiń bastyqtarynyń qatysýymen alqa májilisi ótti.
Onda QR aýyldyq aýmaqtaryn damytýdyń 2004-2010 jyldarǵa arnalǵan memlekettik baǵdarlamasynyń jáne 2002-2010 jyldarǵa arnalǵan «Aýyz sý» salalyq baǵdarlamasynyń iske asyrylý barysy týraly másele qarastyryldy, dep habarlaıdy QazAqparatAShM-niń baspasóz qyzmetine silteme jasap.
Alqa májilisinde Aýyldyq aýmaqtar isteri jónindegi komıtet tóraǵasy S.T. Tuńǵyshbekovtyń jáne Sý resýrstary jónindegi komıtet tóraǵasy mindetin atqarýshy A.O. Ormannyń baıandamalary tyńdaldy.
Qazaqstan Respýblıkanyń aýyldyq aýmaqtaryn damytýdyń 2004-2010 jyldarǵa arnalǵan memlekettik baǵdarlamasyn iske asyrýǵa 535,8 mlrd. teńge, onyń ishinde respýblıkalyq bıýdjetten 227,8 mlrd. teńge, jergilikti bıýdjetterden 243,9 mlrd. teńge jáne basqa kózderden 63,9 mlrd. teńge qarjy baǵyttalǵany atap ótildi. Memlekettik baǵdarlamany iske asyrý jyldary respýblıkanyń aýyldyq eldi mekenderinde bilim berý nysandarymen qamtamasyz etý 173 birlikke kóbeıip, normatıvterge saı kelmeıtin mektepterdiń sany 122 birlikke kemigen. Densaýlyq saqtaý nysandarymen qamtamasyz etilmegen eldi mekenderdiń sany 38 birlikke deıin azaıǵan. Gazben qamtamasyz etilgen aýyldyq eldi mekender sany 228 birlikke kóbeıdi, ortalyqtandyrylǵan elektrmen jabdyqtaýǵa qosylmaǵan aýyldardyń sany 109 birlikke kemip, búginde barlyq aýyldyq eldi mekender telefondandyryldy.
Memlekettik baǵdarlamany jáne «Aýyz sý» salalyq baǵdarlamasyn iske asyrý sheńberinde 985 myń aýyl turǵyndary ortalyqtandyrylǵan sý kózderinen sapaly aýyz sýǵa qol jetkizdi, al respýblıkadaǵy sý qubyrlary bar aýyldyq eldi mekenderiniń úlesi 27,6 paıyzdan 37,3 paıyzǵa deıin ósken.
Alaıda aýyldyq jerlerde sheshýdi qajet etetin birqatar máseleler bar. Bul - jergilikti mańyzy bar joldardyń ahýaly, halyqty sapaly aýyz sýmen, elektrmen jáne gazben qamsyzdandyrý, mektepterdiń jáne densaýlyq saqtaý uıymdarynyń salynǵan merzimi 40 jyldan asqan apatty jáne beıimdelgen úı-jaılarynda ornalasýy.
Alqa májilisiniń sheshimimen oblys ákimderine Qazaqstan Respýblıkasynyń aýyldyq aýmaqtaryn damytýdyń 2004-2010 jyldarǵa arnalǵan memlekettik baǵdarlamasy sheńberinde aýyldyq eldi mekenderdegi áleýmettik jáne ınjenerlik ınfraqurylym nysandarynyń qurylysyna, qaıta qalpyna keltirýge jáne kúrdeli jóndeýge qarastyrylǵan qarajatty ıgerý boıynsha sharalar qoldaný, aýyl turǵyndaryna áleýmettik jáne mádenı qyzmet kórsetýdi qosymsha ulǵaıtý úshin memlekettik-jekemenshik áriptestik tetikterin engizý, jergilikti bıýdjet qarajattarynyń esebinen aýyl turǵyndaryn shaǵyn nesıeleý jóninde jumystardy jalǵastyrý jáne 2010 jylǵa arnalǵan «Jol kartasy» sheńberinde aýyldyq eldi mekender basymdyqqa ıe áleýmettik jáne ınjenerlik ınfraqurylym nysandarynyń tizbesi boıynsha bıýdjettik ótinimderdi qurastyrý men jobalaý-smetalyq qujattardy ýaqtyly jáne sapaly ázirleýdi qamtamasyz etý jáne sýmen qamtamasyz etetin kásiporyndardy qajetti materıaldyq-tehnıkalyq quraldarmen jabdyqtaý usynyldy.
Sý resýrstary jónindegi komıtetke 2002-2010 jyldarǵa arnalǵan «Aýyz sý» salalyq baǵdarlamasyn iske asyrý sheńberinde aýyz sýmen qamtamasyz etýdiń aıaqtalǵan nysandaryn kommýnaldyq menshikke ýaqtyly tapsyrý, turǵyndardy sapaly aýyz sýmen qamtamasyz etý jáne ony berý qyzmetiniń baǵasyn tómendetý boıynsha jumystardy júrgizý tapsyryldy.
