Aýyl sharýashylyǵy mınıstri jemdik astyq qoryn qurý jaǵdaıyna alańdaýshylyq bildirdi
ASTANA. 14 jeltoqsan. QazAqparat /Marlan Jıembaı/ - Aýyl sharýashylyǵy mınıstri Aqylbek Kúrishbaev jemdik astyq qoryn qurý jaǵdaıyna alańdaýshylyq bildirdi. Ol bul týraly búgin selektorlyq rejımde ótken Úkimet otyrysynda aıtty.
Aýyl sharýashylyǵy salasynda sheshimin tappaı kele jatqan biraz máseleler bar ekendigin basa aıtqan ol: «Birinshiden, jemdik astyq qoryn qurý jaǵdaıy alańdaýshylyq týdyrady. Búgingi tańda josparlanǵan 114 myń tonna jemdik astyqtan 6 myń tonna nemese bar bolǵany 5 paıyz ǵana satyp alynǵan. Osyǵan baılanysty bul jumysty jandandyrýymyz qajet. Bul iste jergilikti atqarýshy organdardan, ákimdikterden kómek suraımyz», - dedi.
Sondaı-aq óz sózinde aǵymdaǵy jyldyń 11 qarashasynda Óskemen qalasynda ótken respýblıkalyq keńeste veterınarııa júıesin jetildirý týraly sheshim qabyldanǵan atap ótken mınıstr: «Olardy oryndaý úshin mınıstrlik memlekettik fýnktsııaǵa asa qaýipti juqpaly aýrýlardyń aldyn alý men janýarlardy birizdendirý jáne veterınarııa salasynyń materıaldyq-tehnıkalyq bazasyn odan ári kúsheıtý maqsatynda onyń júıesin kezeń-kezeńimen qosymsha qarjylandyrý jónindegi jumystardy qosý bóliginde zańnamalyq bazany ózgertý týraly tıisti usynystar daıyndady. Osy usynystardy ýaqytynda qoldaý qajet bolady», - dedi.
