Aýyl sharýashylyǵy mınıstri un óndirý kólemi tómendegenin aıtty
«Aǵymdaǵy jyldyń 10 aıynda tamaq ónimderin óndirý kólemi 3,6%-ǵa ósip, 1,8 trln teńgeni qurady. Eseptik kezeńde tamaq ónimderi óndirisiniń negizgi kapıtalyna salynǵan ınvestıtsııalar kólemi 5,9%-ǵa ulǵaıyp, 81,8 mlrd teńgeni qurady. Zattaı mánde aǵymdaǵy jyldyń 10 aıynda jarma óndirý kólemi 5,3%-ǵa, krahmal ónimderin óndirý kólemi 18,7%-ǵa, jemis jáne kókónis shyryndaryn óndirý kólemi 2,8%-ǵa, qant óndirý kólemi 2,6 ese, qyshqyl sút ónimderin óndirý kólemi 5%-ǵa, sary maı óndirý kólemi 9%-ǵa artty», - dedi E. Qarashókeev Úkimet otyrysynda.
Onyń aıtýynsha, un óndirý kólemi 4,5%-ǵa, ósimdik maıyn óndirý kólemi 3%-ǵa, shujyq ónimderin óndirý kólemi 0,4%-ǵa tómendedi.
«Bıyl aýyl sharýashylyǵy ónimderin óńdeý salasynda 29 joba paıdalanýǵa berildi, onyń ishinde jalpy qýaty 34 myń tonna et óńdeý boıynsha 6 joba, jańǵyrtý jáne qurylys esebinen jalpy qýaty 96 myń tonna sút óńdeý boıynsha 10 joba, 530 myń tonna maıly daqyldar óńdeý boıynsha 3 joba jáne jylyna 200 myń tonna bıdaıdy tereńdete óńdeý boıynsha 1 joba, jalpy qýaty 23,5 myń tonna makaron jáne jarma ónimderin óndirý boıynsha 3 joba iske qosyldy. Búginde ınvestıtsııalyq jobalar pýlynda shamamen 100 joba bar. Bular - óndiristiń qosymsha ósimin jáne tıisinshe eksporttyń qosymsha kólemin qamtamasyz etýge múmkindik beretin óńdeý jónindegi jańa jobalar. Bul saıyp kelgende, óńdelgen ónimniń eksportyn ulǵaıtý boıynsha qoıylǵan maqsatqa qol jetkizýge múmkindik beredi», - dedi mınıstr.
