Aýyl sharýashylyǵy mınıstri Saparhan Omarov oqshaýlandy

NUR-SULTAN. QazAqparat – Áriptesterimen birge Aýyl sharýashylyǵy mınıstri Saparhan Omarov ta oqshaýlandy. Mınıstrge qatysty bul aqparatty onyń baspasóz hatshysy Janjigit Omarhan rastady, dep habarlaıdy QazAqparat tilshisi.

Janjigit Omarhannyń habarlaýynsha, Saparhan Omarov koronavırýs boıynsha testten ótip, onyń KVI juqtyrmaǵany anyqtalǵan. Alaıda KVI-den emdeý jáne dıagnostıka hattamasyna sáıkes Aýyl sharýashylyǵy mınıstri belgili bir ýaqyttan keıin qaıtadan testten ótýi tıis. Oǵan deıin mınıstr oqshaýlanady. Jumysyn mınıstr keste boıynsha vıdeokonferentsııa tártibimen jalǵastyra bermek.

Habarlanyp otyrǵandaı, Saparhan Omarov memlekettik organdardyń ózge ókilderimen, onyń ishinde Densaýlyq saqtaý mınıstri Eljan Birtanovpen jumys barysynda jaqyn qashyqtyqta bolǵan.

Eske sala ketsek keshe Densaýlyq saqtaý mınıstri Eljan Birtanov Facebook paraqshasynda koronavırýs juqtyrǵanyn habarlaǵan edi.

12 maýsymda QR Premer-Mınıstri Asqar Mamın Jambyl oblysyna jumys saparymen baryp qaıtty, onda Densaýlyq saqtaý mınıstri E. Birtanov ta bolǵan. Osyǵan baılanysty Úkimet basshysy da oqshaýlanýǵa májbúr bolyp otyr.

Áriptesterimen birge Ashat Aımaǵambetov te oqshaýlandy.