Aýyl sharýashylyǵy mınıstri óńirlerge egis naýqany týraly naqty aqparat berýge shaqyrdy

NUR-SULTAN. QazAqparat - QR Aýyl sharýashylyǵy mınıstrliginde kóktemgi egis jumystaryna daıyndyq jáne ony ótkizý máseleleri boıynsha keńeıtilgen keńes ótti. Beınekonferentsııa baılanysy arqyly oǵan oblys ákimdikteriniń ókilderi qatysty, dep habarlaıdy QazAqparat mınıstrliktiń baspasóz qyzmetine silteme jasap.

Keńeste egis alqaptaryn, aýyl sharýashylyǵy tehnıkasyn, tuqym men tyńaıtqyshtardy daıyndaý, sondaı-aq fermerlerdiń janar jaǵarmaımen qamtamasyz etilýi jáne kóktemgi egis jumystaryn qarjylandyrý barysy talqylandy.

Jıyn barysynda Aýyl sharýashylyǵy mınıstri Saparhan Omarov jergilikti atqarýshy organdar ókilderine oblystaǵy egin naýqanyna qatysty jaǵdaıdy ashyq aıtýǵa jáne mınıstrlikke naqty aqparat berýge shaqyrdy.

«Bizge aqparatty durys berińizder, erteń ár tsıfr úshin jaýap beresizder, óńirlerdiń jaǵdaıyn ashyq aıtyńyzdar, biz bilip otyraıyq», - dep atap ótti S.Omarov.

Sonymen qatar, is-shara barysynda agrarııler qazirgi tótenshe jaǵdaı kezinde egiske jumyldyrylǵan adamdar men tehnıkanyń erkin qozǵalýy týraly máseleni kóterdi. QR AShM jergilikti atqarýshy organdarǵa fermerlerdi qajetti ruqsatnamalarmen múmkindiginshe jyldam qamtamasyz etýdi talap etti.

Buǵan deıin habarlanǵandaı, bıyl aýyl sharýashylyǵy daqyldaryn 22,5 mln gektar jerge egý josparlanyp otyr.

Bul rette, egis alqaptaryn ártaraptandyrý jáne rentabeldiligi joǵary daqyldardy óndirýge kóshý sheńberinde dándi jáne dándi-burshaqty daqyldar kólemi azaıady, al maıly, kókónis-baqsha jáne jem-shóp alqaptary aıtarlyqtaı ulǵaıady.

Qazirgi ýaqytta egis naýqany elimizdiń ońtústik óńirlerinde - Jambyl, Túrkistan, Almaty jáne Qyzylorda oblystarynda belsendi júrgizilýde.