Aýyl sharýashylyǵy mınıstri kúrish óndirýshilerge ónim satýdy ártarapta júzege asyrýdy usynady
ASTANA. 8 qarasha. QazAqparat -Kúrish óndirýshi dıqandar naryqqa baılanysty óz ónimderin ártaraptandyryp otyrýlary qajet.
Búgin Parlament Senatynda «2013-2015 jyldarǵa arnalǵan respýblıkalyq bıýdjet týraly» zań jobasyn talqylaý barysynda depýtattar saýalyna jaýap bergen Aýyl sharýashylyǵy mınıstri Asyljan Mamytbekov osylaı málimdedi.
Toqtala ketetin jaıt, jaryssóz barysynda senator Murat Baqtııaruly bıyl Qyzylorda oblysynyń dıqandary 340 myń tonnaǵa jýyq «syr marjandaryn» jınaǵanyn, bunyń táýelsizdik jyldary ishindegi absolıýttik joǵary kórsetkish ekenin aıtqan. Alaıda, senatordyń sózine qaraǵanda, osy kúrishti tasymaldaýǵa baılanysty dıqandar qıynshylyq kórip otyr. «Astyqty tasý «Qazaqstan Temir Jolynan» «Qaztemirtransqa» berilý sebebinen onyń tasymaldaý quny qymbattady. Kúrishshiler ony taıaý shet elderge jibere almaı otyr», - deıdi M. Baqtııaruly.
Óz kezeginde mınıstr Asyljan Mamytbekov kúrishtiń mol túsimine eń aldymen aýyl sharýashylyǵy salasyna Úkimettiń qoldaýy, sondaı-aq Elbasy tapsyrmasymen salynǵan Kóksaraı sý qoımasy óz septigin tıgizgendigin jetkizdi. «Satý máselesi shyn máninde ótkir bolyp tur. Qazirgi ýaqytta júk tasymaldaıtyn vagondardyń ortalyq biregeı ulttyq kompanııasyn qurý jumystary júrgizilýde. Bunyń ózi «Qaztemirtrans» kompanııasynyń tarıfterin joǵarylatýǵa soqtyrdy», - deıdi A. Mamytbekov. Degenmen, onyń aıtýynsha, naryqta baǵasy budan tómen tasymaldaýshylar da barshylyq.
Sonymen qatar, mınıstr dıqandar óz ónimderin ár baǵyttaǵy básekelestik naryqtarǵa satýlary tıis ekenin aıtty. «Eń birinshi Túrkimenstan, Qyrǵyzstan, Ózbekstanǵa da kúrish jaqsy satylady. Ózi eksportshy bolǵanymen, bizdiń kúrishimizge Reseı de kóp mólsherde qyzyǵýshylyq tanytady. Al Baltyq jaǵalaýy elderi bizdiń basty eksporttyq elderimizdiń qataryna kirmegen, kirý múmkindigi de shamaly», - degen mınıstr dıqandarǵa «naryqqa baılanysty ózderiniń eksporttyq baǵyttaryn naqtylaýdy» usyndy.
