Aýyl sharýashylyǵy mınıstri 3 mln. gektardan astam jańa jaıylymdyq jerlerdi sharýashylyq aınalymyna engizýdi usynady
ASTANA. 8 qarasha. QazAqparat /Qanat Mámetqazyuly/ - Mal sharýashylyǵyn damytý úshin jaıylymdyq jerlerdiń múmkindigin barynsha qoldaný boıynsha keshendi sharalar qabyldaý qajet. Búgin Parlament Májilisinde elimizdiń mal sharýashylyǵyn damytý máseleleri taqyrybynda ótken Úkimet saǵatynda Aýyl sharýashylyǵy mınıstri Aqylbek Kúrishbaev osylaı málim etti.
«Jaıylymdyq jerlerdiń múmkindigin paıdalaný boıynsha tozǵan jaıylymdardy sýlandyrý jáne qalpyna keltirý esebinen 3 mln. gektardan astam jańa jaıylymdyq jerlerdi sharýashylyq aınalymyna engizýdi usynamyn. Bul rette atalǵan úrdis birshama yntalandyrýdy talap etedi. Atap aıtqanda, birinshi kezekte gıdrotehnıkalyq qurylymdar ustaý jáne sýlandyrylatyn jerlerdiń jaǵdaıyn jaqsartý boıynsha shyǵyndardy sýbsıdııalaý arqyly memlekettik qoldaý sharalaryn kúsheıtýdi qarastyramyz. Osy maqsatta sýlandyrylatyn jerlerdi damytý boıynsha tıisti zań jobasy ázirlendi. Ekinshiden, azyqtyq daqyldardyń tuqym sharýashylyǵyn sýbsıdııalaý kólemi artatyn bolady. Úshinshiden, sýlandyrý, daqyldyq jaıylymdardy qurý, tozǵan jaıylymdyq jerlerdi qalpyna keltirý boıynsha is-sharalardy bıýdjet esebinen nesıeleý tetikterin engizýdi josparlap otyrmyz»,- dedi A. Kúrishbaev.
Mınıstrdiń sózine qaraǵanda, atalǵan sharalar jemdik azyqtyń barlyq túrlerine degen suranystyń artýyna, mal azyǵy óndirisin damytýǵa jáne mamandanǵan qurylymdardyń týyndaýyna septigin tıgizedi. «Jalpy azyq óndirisi júıesi barlyq elderde tek osy qaǵıdattarǵa súıene otyryp jasaqtalǵan. Al búgingi kúni bul sharalar elimizdiń 2015 jylǵa deıingi mal azyǵy óndirisin damytý boıynsha ázirlenip jatqan baǵdarlamanyń negizine alynyp otyr»,- dedi mınıstr.
