Aýyl sharýashylyǵy mamandyǵyn grantpen bitirgenderdi aýylda eńbek etýge mindetteý kerek - AShM
ASTANA. QazAqparat - Qazaqstandaǵy JOO-larda aýyl sharýashylyǵy mamandyǵyn grantpen bitirgen stýdentter 3 jyl aýylda eńbek etýge mindettelýi yqtımal. QR AShM birinshi vıtse-mınıstri Arman Evnıev Parlament Senatynda ótken dóńgelek ústelde mınıstrlik osyndaı jospardy zerdelep jatqanyn atap ótti, dep habarlaıdy «QazAqparat» HAA tilshisi.
«Bizdiń jumystyń aýqymdy salalarynyń biri - agrarlyq ǵylym. Demek, agrarlyq ǵylymdy qaıta qosyp (perezagrýzıt), álemdegi qoljetimdi úzdik tehnologııalardy engize otyryp, tyń tuqymdar men surypty oılap tabý kerek. Mınıstrliktiń júıesinde qazirgi tańda 3 ýnıversıtet pen 23 ǵylymı-zertteý ınstıtýty bar. Olardyń sany aldaǵy ýaqytta eki esege qysqaratyn bolady. ıAǵnı, keleshekte ǵylymnyń shynaıy óndiristen bólinip qalý máselesin eńserý qajet. Jetekshilik etetin ǵylymı kadrlar qatań túrde oılaý progressıvtiligi men óndirýshilerdiń básekege qabilettiligin taldaı bilý qaǵıdaty boıynsha tańdalady», - deıdi Arman Evnıev.
Vıtse-mınıstrdiń aıtýynsha, agrarlyq JOO-lar zertteý mártebesine ıe bolýy tıis.
«Osylaısha, Qazaq agrotehnıkalyq ýnıversıteti barlyq óńirler úshin agroónerkásip keshenin tsıfrlandyrý ortalyǵyna aınalady. QazUAÝ (Qazaq ulttyq agrotehnıkalyq ýnıversıteti) bazasyndaǵy zertteý ınstıtýty sýarmaly jerlerdiń qunarlylyǵy, jemis sharýashylyǵy, kartop óndirý, aýyl sharýashylyǵy kooperatsııalary men sút sharýashylyǵy salalaryn zertteıtin bolady. Al mal sharýashylyǵynyń damytý salasy - Batys Qazaqstan oblystyq agrarlyq tehnıkalyq ýnıversıtettiń negizgi basymdyǵy bolmaq», - deıdi ol.
Arman Evnıev sonymen birge, aldaǵy ýaqytta aýyl sharýashylyǵy mamandyǵyn oqyp jatqandardyń sanyn arttyrý mańyzdy ekenin tilge tıek etti.
«Memlekettik tapsyrys aıasynda aýyldyq kvotany 30-dan 70 paıyzǵa deıin arttyrý mańyzdy. Sonymen birge, aýyl sharýashyǵy mamandyqtaryna bólinetin granttardyń 70 paıyzyn agrarlyq JOO-larǵa berý kerek. Biz sondaı-aq, ortasha arnaıy mamandyqtar boıynsha ákimdikterdiń memlekettik tapsyrysyn qaıta qaraýǵa tıispiz. Buǵan qosa aýyl sharýashylyǵy mamandyǵyn grantpen bitirgenderge 3 jyl boıy aýylda jumys isteýdi mindettegen abzal», - dep túıdi vıtse-mınıstr.
