Aýyl sharýashylyǵy mamandary BQO-daǵy kıikter óliminiń saldaryn anyqtady
ASTANA. 30 qyrkúıek. QazAqparat /Aıdar Ospanalıev/ - Sońǵy eki jyldyń mamyr aıynda Batys Qazaqstan oblysynyń Jánibek aýdanynda kıikterdiń jappaı qyrylý oqıǵalary oryn alyp keledi.
2010 jyly munda 12 myń bas kıik ólse, bıylǵy jyly olardyń sany 500-di quraǵan. Bul rette ólgen kıikterdiń 95 paıyzy analyqtar men laqtar ekenin aıta ketý kerek. Búgin Astanada elimizdiń Aýyl sharýashylyǵy mınıstrliginiń Orman jáne ań sharýashylyǵy komıteti men halyqaralyq uıymdardyń ókilderi jáne mal dárigerleri jınalyp, osy máseleni boıynsha zertteý jumystarynyń nátıjesin jarııa etti jáne ol boıynsha ózara pikir almasty.
Májilis barysynda kıikterge qatysty oryn alyp otyrǵan másele jaıynda sóz sóılegen Aýyl sharýashylyǵy mınıstrliginiń Orman jáne ań sharýashylyǵy komıteti tóraǵasynyń orynbasary Qaıyrbek Musabaevtyń aıtýynsha, Batys Qazaqstan oblysynda eki jyldan beri kıikterdiń qyrylý jaǵdaılary oryn alyp otyr. «Janýarlardyń jappaı qyrylý jaǵdaılary jyl saıyn ylǵı da bir jerde oryn alatyndyqtan, biz bul máseleni zertteýge elimizben birge halyqaralyq sarapshylardy da shaqyrdyq. Ótken jyly esterińizde bolsa, biz kıikterdiń ólimine pasterellez aýyrýy sebep bolǵan degen baılam jasaǵan bolatynbyz. Alaıda bul janýarlardyń ólimine sebep bolyp otyrǵan basty másele emes edi. Kıeli janýardyń óliminiń basty sebebin búgin sarapshy mamandar anyqtap otyr. Olardyń derekterinshe, kıikter shópti shekten tys kóp jep, ishteriniń kebýi saldarynan ólýde»,-deıdi komıtet tóraǵasy.
Mal dárigeri, vırýsolog maman Ádilqasym Jaqypbaev bul máseleni bylaısha túsindiredi. «Kıikter ólgen aımaqta tuman bolyp, shópke kóp mólsherde shyq túsken. Biz ol jerdi baryp kórgen kezimizde jerdiń shóbi óte shúıgin bolyp shyqty. Al kıik bolsa laǵyn týǵannan keıin onyń tóli jatady da, analyq kıik shóp izdep ketedi. Mańaıda sý bolmaǵan soń analyq kıik shyq basqan shuraıly shópti shekten tys kóp jep, ishi keýip óledi. Al onyń tóli anasy joq bolǵan soń ashtan óledi»,-deıdi maman.
Osyǵan baılanysty basqosýǵa qatysýshylar máseleniń sheshimi retinde kıikter jaıylatyn aımaqtaǵy shópti órteý qajet degen baılamǵa keldi. «Jánibek aýdanyndaǵy shúıgin kók shóbi bar jerlerdi anyqtap, mamyr aıynda, ıaǵnı kıikter keletin mezgilde shaýyp tastaý kerek. Shabylǵan shópti kıik jemeıdi nemese gırbıtsıd dárisin qoldanyp, shópti kúıdirip jiberýge bolady»,-deıdi mamandar.
