Aýyl sharýashylyǵy maqsatyndaǵy jerler aýktsıon arqyly jeke menshikke satylatyn bolady - E. Dosaev

ASTANA. QazAqparat - Aýyl sharýashylyǵy maqsatyndaǵy jerler aýktsıon arqyly jeke menshikke satylatyn bolady. Bul týraly búgin Májilistiń jalpy otyrysynda QR Ulttyq ekonomıka mınıstri Erbolat Dosaev málim etti. Jalpy otyrysta «QR Jer kodeksine ózgerister men tolyqtyrýlar engizý týraly» zań jobasy birinshi oqylymda talqylanǵan bolatyn. Qujat Elbasynyń «100 naqty qadam» Ult josparyn júzege asyrýǵa baǵyttalady.

«Aýyl sharýashylyǵy maqsatynda jerdi tıimdi paıdalaný úshin ony aýktsıon arqyly jeke menshikke satý kózdeledi. Bul rette memleket menshigindegi aýyl sharýashylyǵy maqsatyndaǵy jerler Qazaqstan azamattary men zańdy tulǵalaryna jeke menshiktik quqyqpen aýktsıon arqyly kezeńder boıynsha berilmek. Atap aıtqanda, birinshi kezekte jer ýchaskesiniń kadastrlyq qunyn arttyrýdy kózdeıtin aýktsıon arqyly satylady. Bul rette aǵylshyndyq ádispen bolatyn eki aýktsıon arqyly ýchastok satylmasa, onda ol endi jer ýchaskesiniń kadastrlyq qunynyń elý paıyzyna tómendetiletin aýktsıonǵa qoıylatyn bolady. Bul jerdiń tolyqqandy naryqtyq quralǵa aınalýyna jáne aýyl sharýashylyǵynyń ótimdi aktıvi bolýyna jol ashady», - dep túsindirdi mınıstr Erbolat Dosaev.

Onyń aıtýynsha, jalǵa berilgen jer ýchaskelerin satyp alý boıynsha jeńildik sharttary da qarastyrylady. Mınıstrdiń sózine qaraǵanda, bul norma búgingi jalǵa alýshylardyń múddesine oraılastyrylady. Bul rette olarǵa budan buryn berilgen aýyl sharýashylyǵy jer ýchaskelerin paıdalaný quqyǵynyń merzimi aıaqtalǵanǵa deıin jeke menshikke jerdiń kadastrlyq qunynyń elý paıyzy mólsherine deıin aıqyndalatyn jeńildik baǵamen tóleý qarastyrylady. Bul tóleý merzimi keıinnen on jylǵa deıin uzartylý quqyǵy da kózdeledi.