Aýyl sharýashylyǵy qurylymdaryn qarjylaı ońaltý tetikteri talqylandy - Aqmola oblysy
KÓKShETAÝ. QazAqparat - Aqmola oblysynyń ákimi Málik Myrzalınniń tóraǵalyǵymen «Álibı» kompanııa tobynyń problemalyq máselesi boıynsha shtab otyrysy bolyp ótti, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.
Sharaǵa QR Aýyl sharýashylyǵy vıtse-mınıstri Berik Beısenǵalıev, «Azyq-túlik korporatsııasy» Ulttyq kompanııasy» AQ, «QazAgroGarant» AQ, «Agrarlyq kredıttik korporatsııasy» AQ, «QazAgro» Holdıng» AQ basshylary, aýdan ákimderi, salalyq mmlekettik organdar men qarjy ınstıtýttary, «Álibı» kompanııa tobyna kiretin 11 aýyl sharýashylyǵy qurylymynyń dırektorlary qatysty.
«Memleket basshysynyń tapsyrmasy sheńberinde elimizdegi problemaly agroholdıngterde qarjylyq tártipti retke keltirý boıynsha Aqmola oblysynda nesıelik táýekeldi taldaý, qarjy ınstıtýttary aldynda borysh qurylymyn qaıta qaraý jumystary júrgizilýde. Sondaı-aq, birqatar aýyl sharýashylyǵy qurylymdaryn ońaltý protsesi iske qosyldy»,- dedi óz sózinde Málik Myrzalın.
Sonymen qatar, aımaq basshysy «Álibı» kompanııa tobyna kiretin aýyl sharýashylyǵy qurylymynyń aktıvterin túgendeý búgingi kúnniń basty mindeti ekenin atap ótti. Kelesi kezekte sharýashylyq sýbektilerin qarjylyq ońaltý jáne qajylyq taldaý isi qolǵa alynbaq.
Atalmysh aýyl sharýashylyǵy kásiporyndary ornalasqan aýdandardyń ákimderi men quzyrly memlekettik organdardyń basshylaryna kóktemgi dala jumystaryna daıyndalý týraly tapsyrma berildi.
«Bizge kóktemgi dala jumystaryn sapaly júrgizý úshin tıisti sharalardy ýaqtyly qolǵa alý qajet. Janar-jaǵarmaı men ózge de taýarly-materıaldyq qundylyqtar satyp alý úshin qarjylandyrýǵa qoljetimdi bolýy, kadrlyq áleýetti ustap turýdy, eńbekkerlerge jalaqyny ýaqytynda tóleýdi qamtamasyz etý kerek», - dedi aımaq basshysy.
