Aýyl sharýashylyǵy kooperatıvterin qurýǵa aıryqsha mán berilip otyr - Janseıit Túımebaev
ASTANA. QazAqparat - Ońtústik Qazaqstan oblysynyń ákimi Janseıit Túımebaev óńirde aýyl sharýashylyǵy salysyn damytýdyń qadamdaryn aıtyp berdi, dep habarlaıdy QazAqparat.
«Aýyl sharýashylyǵyn ekonomıkanyń jańa draıverine aınaldyrý baǵytynda naqty sharalar atqarylýda. Joldaýda aıtylǵan negizgi baǵyt - kooperatıvter uıymdastyrý jumystary belsendi túrde júrgizilip keledi. Búgingi kúnge oblysta 40 myńǵa jýyq (39 591) úı jáne fermerlik qojalyqtardan biriktirilgen 363 aýyl sharýashylyǵy kooperatıvteri quryldy. Jerdi tıimdi paıdalaný, sýarmaly egisti keńeıtý boıynsha óndiriske jańa tehnologııalar, tamshylatyp sýǵarý ádisi, jylyjaılar salý, ıntensıvti baýlardy ulǵaıtý jumystaryn qarqyndy damytatyn bolamyz»,-dedi Túımebaev Ortalyq kommýnıkatsııalar qyzmetindegi baspasóz máslıhatynda.
Óńir basshysynyń sózine qaraǵanda, ústimizdegi jyly egistik kólemi 792,3 myń gektarǵa, ıntensıvti baý aýmaǵy 2630 gektarǵa jetkiziledi. Onyń paıymynsha, qazirgi tańda ıntensıvti baýlardyń tıimdiligine sharýalardyń kózderi tolyǵymen jetip otyr. Dástúrli baýlardan gektaryna 40-50 ts ónim alynsa, ıntensıvti baýlar 500 - 600 ts deıin ónim alýǵa múmkindik beredi.
«Budan bólek, 493 gektar jerge jańǵaq (2016 jyly 353 ga) jáne alǵashqy ret 50 gektar badam baýlaryn otyrǵyzý josparlanýda. Jylyjaılar alańy 1 323 gektarǵa jetkiziledi», - dedi Túımebaev.
Ákimniń aıtýynsha, 2017 jyly shaǵyn mal bordaqylaý alańdary sany 3 013-ke kóbeıip - 12 163, januıalyq sút fermalar 722 birlikke artyp - 1 938, shaǵyn qus fermalary sany 14-ke artyp - 42, balyq sharýashylyqtary 31-ge jetpek.
2017 jyly aýyl sharýashylyǵynyń jalpy ónim kólemi 476 mlrd teńgeni qurap, ósim 3,7 % deńgeıinde bolady dep josparlanyp otyr.
