Aýyl sharýashylyǵy kooperatıvterin qoldaý maqsatynda BQO-ǵa 1 474 mln teńge nesıe bólý kózdelýde

ORAL. QazAqparat - Elbasy bıylǵy Joldaýynda Úkimet pen ákimderge bes jyl ishinde 500 myńnan astam jeke úı sharýashylyqtary men shaǵyn fermerlerdi kooperatıvterge tartý jóninde tapsyrma bergeni málim. Osyǵan baılanysty QR Aýyl sharýashylyǵy mınıstrligi aldyna aýyl sharýashylyǵy kooperatıvterin keń aýqymda qoldaý jáne jeke qosalqy sharýashylyqtardy paıdalaný arqyly aýyl turǵyndaryn jumyspen qamtý baǵytynda úlken mindetter qoıylyp otyr. Bul týraly Ortalyq kommýnıkatsııalar qyzmeti óńirlik fılıalynda QR AShM Ósimdik sharýashylyǵy ónimderin óndirý jáne qaıta óńdeý departamenti strategııa jáne taldaý basqarmasynyń basshysy Nurbolat Maqashev málim etti, dep habarlaıdy «QazAqparat» HAA tilshisi.

Onyń aıtýynsha, «Aýyl sharýashylyǵy kooperatıvteri týraly» QR Zańynyń ótken jyldyń qańtarynan kúshine engenine qaramastan, sharýalar kooperatıvterdiń ekonomıkalyq jaǵynan qanshalyqty tıimdi ekendigin tolyq sezine qoıǵan joq. Kooperatsııa degenimiz - aýyl sharýashylyǵy taýaryn óndirýshilerdi ekonomıkalyq turǵyda biriktirý. Mundaǵy artyqshylyqtardyń máni mynada, eń aldymen eńbek ónimdiligi artyp, ótkizetin taýar mol bolǵannan keıin ónimge suranys turaqtalady, óndiris qýaty tıimdi paıdalanylyp, shyǵyn azaıady, marketıngtik aqparatqa qol jetkiziledi. Eń bastysy, memlekettik qoldaý sharalary kórsetiledi.Sondyqtan árkim óz betimen, jeke-jeke ómir súrýdiń tıimsiz ekendigin túsinetin ýaqyt jetti. Odan da birlesip aýyl sharýashylyǵy ónimderin qaıta óńdeýge baǵyt ustap, sút ónimderin qabyldaıtyn ortalyq qurylsa nemese otbasylyq bordaqylaý jáne mal soıý alańdary ashylyp, ortalyqtandyrylsa, aýyl turǵyndarynyń utatyny anyq.

«Osyǵan oraı Aýyl sharýashylyǵy mınıstrligi «QazAgro» enshiles uıymdary arqyly modýldi sút qabyldaý jáne mal soıý ortalyqtaryn alǵashqy jarnasyz lızıngke berý syzbasyn daıyndady. Bastapqy jarna retinde ınvestsýbsıdııa (50 paıyz) jáne satyp alynǵan qondyrǵylar kepilge qoıylady. Agroónerkásip keshenin damytýdyń 2017-2021jyldarǵa arnalǵan memlekettik baǵdarlamasy aıasynda kooperatıvterdi damytý baǵytynda mal sharýashylyǵy ónimderin sýbsıdııalaýdyń jańa baǵyttary qarastyryldy. Mysaly, kooperatıvterde óndirilgen súttiń bir lıtrine 10 teńge, bordaqylanǵan ógizshelerdiń ár basyna 20 myń teńge, qozyǵa 1500 teńgeden tólenedi. Sondaı-aq qurama jem óndirisin arzandatý, birjyldyq jáne kópjyldyq jemshóp daqyldaryn sýbsıdııalaý, bıyldan bastap kooperatıvterdi qoldaý maqsatynda olardyń satyp alǵan qural-jabdyqtaryna jumsalǵan shyǵynnyń 50 paıyzyn qaıtarý kózdelgen. Oǵan qosa «Yntymaq» nesıe baǵdarlamasy kooperatıvterdi qosymsha qarjylandyrýǵa baǵyttalsa, «Igilik» mal basyn kóbeıtýge, «Birlik» sút qabyldaý ortalyqtaryn, «Bereke» baǵdarlamasy otbasylyq bordaqylaý alańyn qurýǵa qyzmet etpek. Aýyl sharýashylyǵyn damytýǵa baǵyttalǵan shaǵyn nesıe (18 mln. teńge) 7 jylǵa berilmek»,- dedi N.Maqashev.

BQO aýyl sharýashylyǵy basqarmasy basshysynyń mindetin atqarýshy Serik Nurmaǵambetovtiń málim etkenindeı, óńirdiń birqatar aýdandarynda qazirdiń ózinde kooperatıvter qurylyp, jumys jasaýda. Aldaǵy ýaqytta olardyń aıasy keńeıe túsedi deýge negiz bar. Sebebi kooperatıvterge birikken jeke qosalqy sharýashylyqtardy paıdalaný arqyly azyq-túlik qaýipsizdigin qamtamasyz etý baǵytynda bıyl Batys Qazaqstan oblysyna 1 474 mln teńge bıýdjettik nesıe bólý josparlanýda.