Aýyl sharýashylyǵy ekonomıka draıveri
ASTANA. QazAqparat - Qazaq ulttyq agrarlyq ýnıversıtetine Almaty oblysynyń ákimi Amandyq Batalov resmı jumys saparymen kelip, oqý ornynyń ınnovatsııalyq baǵyttaǵy ǵylymı ortalyqtaryn aralap, ǵalymdarmen, bilim alýshy jastarmen kezdesti, dep habarlaıdy QazAqparat.
Ýnıversıtet rektory, akademık Tilektes Espolov bastaǵan oqytýshy-professorlar quramy aımaq basshysyna oqý orny bazasyndaǵy zamanaýı Agrotehnologııalyq hab, sonyń ishinde Qazaqstan-Belarýs agroınjenerlik ınnovatsııalyq kórsetilim alańy, Qazaqstan-Japon ınnovatsııalyq ortalyǵy, Oqý-tájirıbelik baq, Innovatsııalyq sý ortalyǵy jáne Innovatsııalyq jylyjaı jumysymen tanystyrdy.
Kezdesý barysy budan keıin oqý ornynyń bas ǵımaratynda ótken «Qazaq ulttyq agrarlyq ýnıversıteti» kommertsııalyq emes aktsıonerlik qoǵamy dırektorlar keńesiniń keńeıtilgen otyrysynda jalǵasty. Aımaq basshysynyń resmı jumys saparyna oraı ótken jıynǵa «Qazaq ulttyq agrarlyq ýnıversıtetiniń» KeAQ dırektorlar keńesiniń músheleri, basqarma músheleri, ýnıversıtettiń basqarýshy mamandary, dekandar, sonymen qatar, ǵylymı-zertteý ıns-tıtýttarynyń ǵalymdary jáne BAQ ókilderi qatysty.
Basqosýda Qazaq ulttyq agrarlyq ýnıversıtetiniń rektory, UǴA vıtse-prezıdenti, akademık Tilektes Espolovtyń 2016 jyly ýnıversıtette atqarylǵan jumystar týraly baıandamasy tyńdaldy. KeAQ dırektorlar keńesiniń músheleri aldaǵy kezeńge arnalǵan josparlar qurdy.
Rektor óz sózinde Qazaq ulttyq agrarlyq ýnıversıteti qazaqstandyq oqý oryndary arasynda alǵashqylardyń biri bolyp ulttyq zertteý ýnıversıtetine transformatsııalanǵanyn atap ótip, osy baǵytta memleket júktegen mindetterdi ǵalymdarmen, óndirisshilermen birlesip, barynsha júzege asyryp otyrǵandyǵyn atap ótti.
Oqý orny óz bazasyndaǵy ǵylymı-zertteý ortalyqtary arqyly aýyl sharýashylyǵynyń ár salasyndaǵy problemalardy zerttep, solardy ǵylymı jolmen sheshýde qarqyndy jumystar atqarýda. Sonymen qatar halyqaralyq talaptarǵa saı bilimmen qarýlanǵan agroónerkásiptik keshenniń jańa býyn mamandaryn daıyndaýda da elimizdegi aldyńǵy qatarly bilim oshaǵy bolyp tabylady. Magıstrant, doktoranttar - jas ǵalymdarymyz ózderiniń ǵylymı jobalaryn jasap, óndiriske jańalyqtar engizýde.
Kezdesýge arnaıy kelgen «Baıserke-Agro» ǵylymı-óndiristik oqytý ortalyǵynyń dırektory Temirhan Dosmuhambetov búgingi kúni ortalyq Almaty oblysy ákimdigimen, Qazaq ulttyq agrarlyq ýnıversıtetimenmen áriptestik baılanysta birlesken jobalardy tıimdi iske asyryp kele jatqandyǵyn tilge tıek etti.
Qazirgi ýaqytta ýnıversıtet stýdentteri ekinshi kýrstan bastap «Baıserke-Agro» ǵylymı-óndiristik oqytý ortalyǵynda óndiristik praktıkadan ótip keledi.
Otandyq aýyl sharýashylyǵy bilimi men ǵylymynyń kóshbasshysy sanalatyn Qazaq ulttyq agrarlyq ýnıversıtetinde atqarylyp jatqan jańa baǵyttaǵy aýqymdy jumystarǵa joǵary baǵasyn bergen aımaq basshysy Amandyq Ǵabbasuly aldaǵy ýaqytta da Almaty oblysy men ýnıversıtet arasyndaǵy tyǵyz baılanystar óz jalǵasyn tabatynyna senim bildirdi.
Kezdesýdi qorytyndylaı kele, ákim: «Elbasy Joldaýynda aıtylǵandaı ekonomıkamyzdyń draıveri bolyp otyrǵan aýyl sharýashylyq salasyn jandandyrýǵa ǵylymdanǵan óndiristi meńgergen bilikti mamandar daıyndaý arqyly úles qosý isinde - Qazaq ulttyq agrarlyq ýnıversıteti zamanaýı baǵytta utymdy qadamdar jasap otyr dep», - erekshe atap ótti.
