Aýyl sharýashylyǵy baǵytyndaǵy stýdentterdi óndirispen sabaqtastyryp oqytý qajet - sala ardageri Amangeldi Momyshev
ASTANA. QazAqparat - Aýyl sharýashylyǵy salasynda uzaq jyldar boıy qyzmet etken, búginde QR Aýyl sharýashylyǵy mınıstriniń keńesshisi, qoǵam qaıratkeri Amangeldi Momyshevtiń paıymynsha, stýdentterdi óndirispen sabaqtastyryp oqytý qajet.
«Jalpy ózimniń tájirıbeme súıenetin bolsam, oqý men óndiristik tájirıbeni qatar alyp júrý kerek. Atap aıtqanda, aýyl sharýashylyǵy salasyndaǵy joǵary oqý oryndarymyz bar. Solardyń barlyǵy jastardy tájirıbege jıi aparyp, bilikti mamandardyń janynda ustap, olardyń jumys úderisinen tálim alýlary qajet. Máselen, men baıqaǵan oqýdy bitirgen keıbir jas mamandar egisterdegi jaǵdaıdy nemese aýyl sharýashylyǵy ónimderin óńdeý salasynyń mán-jaıyn tereń bilmeıdi», - dedi aýyl sharýashylyǵy salasynyń ardageri «QazAqparat» tilshisine bergen suhbatynda.
Onyń pikirine qaraǵanda, bolashaq mamandardyń bilimin jetildirý úderisine, olardyń ónim óńdeý baǵytyndaǵy óndiristerdegi tájirıbesine Aýyl sharýashylyǵy mınıstrligi de aralasýy tıis.
«Búginde Qazaqstanda et pen sút óndirisi kásiporyndary artyp keledi. Bul, birinshiden, elimizdi ishki ónimmen qamtamasyz etýmen qatar, eksporttyq áleýetti damytýda mańyzdy. Al bul kásiporyndarǵa bilikti mamandar óte qajet. Sondyqtan stýdentterdiń oqýy men tájirıbesin sabaqtastyrýǵa aıryqsha mán berý kerek», - deıdi mınıstrdiń keńesshisi.
Amangeldi Arshabaıuly Momyshev 1943 jyly dúnıege kelgen. Et-sút ónerkásibi ınjener-tehnology. M.H.Dýlatı atyndaǵy Taraz memlekettik ýnıversıtetiniń qurmetti professory. QR Injenerlik akademııasynyń múshe-korrespondenti. «Nur Otan» HDP Jambyl oblystyq bólimshesi tóraǵasynyń orynbasary. 2007 jyldan QR Parlamenti Májilisi 4-shi shaqyrylymynyń depýtaty boldy. «Qurmet», «Parasat» ordenderimen «Aýyl sharýashylyǵy salasynyń úzdigi» tósbelgisimen marapattalǵan. Aýyl sharýashylyǵy ardagerleri keńesiniń múshesi.
